Kominike Lapolis-Aksidan lo larout |29 January 2007

Dan en premye lensidan, Frederick Duval, en zonm 36-an sorti Bel Ombre, ti mor apre ki i ti ganny tape par en loto vizavi Erport Pointe Larue Vandredi swar.
 
Swivan sa aksidan, Duval ti kas son 2 kote lipye e osi sibir dimal dan figir. 
Letan sa aksidan ti arive loto ki ti pe dray par en zonm 31-an ki reste Pointe Larue ti pe fer direksyon lavil. 

Dan sa dezyenm lensidan, en pti fiy 6-an ek en lot 12-an i admit dan ICU, Lopital Victoria, tandis ki en zonm 65-an, drayver en pti pick-up, i admit lo ward apre ki sa pti pick-up ki zot ti ladan ti fer kolizyon avek en pli gro pick-up.

Sa lensidan ti ariv Sanmdi swar vizavi Legliz Anglikan, Anse Royale.

Apard sa trwa dimoun ki'n ospitalize, 2 lezot viktim ti resevwar tretman e apre ganny large.
Letan aksidan ti arive sa pti pick-up ti pe fer direksyon lavil sorti bor Takamaka tandis ki sa gran pick-up ti pe pran direksyon Les Canelles sorti lavil.
Lapolis pe fer lanket dan sa de aksidan.

Dife i detri en lakaz konpletman

Dife in konpletman detri en lakaz Anse Severe, La Digue. 
Sa lensidan ti ganny raporte avek lapolis 4.15 dimans 28 Zanvye granmaten. 

Letan sa lensidan ti arive ti annan 3 dimoun dan sa lakaz 2 lasanm an tol ki son twalet ek lasanmben i an blok. 

Personn pa'n ganny dimal swivan sa dife. 
Propriyeter sa lakaz, msye Sam Socrate, in resevwar tretman pour sok e apre ganny large.
Lapolis pe fer lanket dan sa lensidan.