Jean Sultan (24.6.1955 – 24.2.2007)-Adye ‘Papa’ |03 March 2007
Jean Sultan, ki ti enn bann veteran dan lanmizik Seselwa, ti tre popiler dan bann lannen 70 e 80. Ti anfet an 1978 ki i ti fer sorti son premye kaset avek tit Seselwa viv lo nou pei. Sa lepok Jean ti popiler akote bann lezot santer parey Joseph Louise, David Philoe, John Wirtz, Despilly William, pour nonm ennde.
Pandan son karyer mizikal Jean in fer sorti plizyer kaset avek bann tit parey Zis ou menm, Ki mon pou fer, Labyenveni, Donn li son valer, Welele parmi lezot ankor.
Me pour bokou nou, nou pou touzour mazin Jean atraver son bann sanson ki’n fer bokou sikse tel koman Lo lasose, Melita e Pa pous mwan tro vit.
Fodre fer remarke ki Jean in toultan sant lo lanmour, patriotizm ek bann sityasyon lavi toulezour.
Jean, ki sorti dan en fanmiy dis zanfan, ti ne lo zil Chagos le 24 Zen 1955 e i annan en frer zimo ki apel Jean Baptiste.
Jean ti grandi e fer tou son letid lo Zil Chagos menm.
Depi i ti ankor zanfan, Jean ti kontan lanmizik e bann lenstriman mizikal ki i ti pli kontan ti gitar ek armonika.
Dan bann letan ki i ti fek komans rikord sanson e sa ti an 1975, i ti zwe son gitar limenm e fer son bann lanrezistreman avek Radyo Sesel sa letan.
Pandan son karyer mizikal Jean in osi zwe dan ennde benn telki Laflanm e in osi ganny sans partisip dan plizyer spektak ki’n fer isi Sesel e in osi al performen Rodrigue e sa ti an 1985.
Pour en bon pe letan Jean pa’n tro aktiv lo lasenn lanmizik me sa pa vedir ki i pa ti zwe son gitar.
Son ser Lorna i dir ki dan son pastan Jean ti kontan zwe zwe son gitar e osi ekrir sanson.
Jean, ki ti en papa 3 zanfan -- de garson ek 1 fiy -- ti reste Roche Caiman pre obor son ser Lorna.
Lorna, ki ti tre pros avek Jean, in dekri li koman en dimoun ki ti tre amikal e farser me osi byen serye kot i konsern son travay.
“I ti toultan pare pour remontrans nou ler ti neseser e tou son bann nyes ek neve ti ekoute ler i ti koz en kou”, Lorna ti dir.
Jean ki’n travay pour plizyer lannen koman en debarder lo por lapes, ti osi form parti lafors milisya ki apre ti vin gard nasyonal. Ziska avan son lanmor Jean ti en gard nasyonal.
Pour plizyer lannen Jean in osi enn bann dimoun ki’n donn son disan regilyerman lopital Victoria.
Swivan lanmor Jean, Konsey Nasyonal pour Lar ti fer sorti en pti kominike dan ki son bann koleg mizisyen in eksprim zot profon senpati avek tou son fanmir ek zanmi.
“Sesel e osi lemonn lanmizik in perdi en zanmi senser ki pa pou fasil pour oubliye,” sa kominike ti dir.
Lanterman Jean ti fer Zedi apremidi Katedral Immaculee Conception.
Jean i kit deryer son manman, tou son bann frer ek ser, son 3 zanfan e osi son konpanny Linda.
M.A.L