Bann sourd i devlop lalang sinny Seselwa |12 March 2008
Sa 4 manm APHI - Jonathan Sam, Benette Botsoie, Suzie Heck e Shana David - i aprezan bann ansenyan ofisyel lalang sinny kreol Seselwa e zot ti ganny prezante avek zot sertifika Vandredi pase pandan en seremoni kot Sant Lazenes.
Sa seremoni prezantasyon sertifika ti deroul dan prezans tyerperson APHI, Madanm Anika Gardner ki’n osi form sa 4 ansenyan Seselwa, reprezantan Lenstiti Nayonal bann Zenn Sourd sorti Paris, Msye Alain Gebert, direkter zeneral pour bann lekol dan Minister Ledikasyon, Madanm Merida Delcy, tyermenn Lungos, Msye Bernard Elizabeth, bann dimoun ki’n ede dan realizasyon sa proze e bann manm APHI zot menm.
Prezan ti osi 3 ansennyan Lenstiti Nayonal pour Ledikasyon (NIE) ki anba sa proze ti’n ganny formasyon pedagozik pour devlop programm lantrennman pour lalang sinny kreol Seselwa ki pou ganny servi dan en lekol pour bann sourd ki pou ganny etablir isi byento.
Kan i ti adres bann envite, tyerperson APHI Madanm Gardner ti dekri sa proze letablisman lalanng sinny kreol Seselwa konman en proze istorik.
I ti dir ki sa diksyoner in ganny realize apre bokou travay resers, desinen e koleksyon lenformasyon tre konpleks ki’n parfwa tre difisil.
Madanm Gardner ti felisit bann partisipan e ti dir zot ki zot in konpran ki zot annan en rol enportan pour zwe dan progranm ki konsern zot e osi aport en kontribisyon pozitif dan sosyete.
I ti osi presize ki realizasyon sa proze lalang sinny i en baz pour lezot progranm ki konsern dimoun sourd dans Sesel. I ti azoute ki i sirtou en zouti endispansab dan lansenyman bann zafan sourd dan lekol.
Madanm Gardner ti fer remarke ki avek realizasyon sa proze, kominote dimoun sourd dan Sesel pou kapab rezouir menm kalite ledikasyon parey bann dimoun normal i gannyen, koumsa zot a kapab swazir en travay dan zot gou e ganny loportinite pour partisip e kontribye dan devlopman zot pei.