Akoz Praslin Warriors pa pas lo televizyon SBC? |13 June 2008

Permet mwan en pti plas dan ou zournal pour ekri de pti mo. Sanmdi pase lekip Praslin Warriors ti pe zwe en rankont basketbòl kont lekip MBU Rockers dans Palais des Sports. Letan SBC Sports News ti arive, zot ti deside asiz deor e pa filmen sa rankont. Petet akoz i ti en sirpriz pour vwar en pti lekip Praslin pe bat en gro lekip.

Eski dan Sesel zis Premium Cobras ek PLS Hawks ki annan priorite lo SBC? Mon pe demann sa kestyon akoz zis apre rankont Praslin Warriors/MBU Rockers, lekip SBC ti antre dans Palais des Sports pour filmen rankont ant sa de lekip.

Ser Editer, Pralinwa osi i bezwen konnen ki arive avek zot lekip letan i desann Mahe pour al partisip dan bann rankont. Par piblisite lo televizyon sa i a kapab reponn kestyon bann Pralinwa e osi petet ouver en laliny sponsor ki bann lekip sorti Pralen i byen bezwen aktyelman.

CNN zot moto I dir “You’re the first to know” me dezormen pour lekip SBC sa i lanver.
 
Eski zot pe vreman travay pour promot sport dan Sesel?
Akoz toultan zournal Seychelles Nation i fer son louvraz san diskresyon e donn tou rezilta a ler?

Si zot vreman pe travay pour promot basketbòl dan Sesel, la prosenn fwa filmen tou lekip, donn zot en sans parey tou larestan lekip me non pa met lavenir sport ek desizyon dan en sel lanmen.

Ser editer, ankor enn fwa mersi bokou.

Randolph Valmont,
Head Coach Praslin Warriors

Not Editer
Dapre responsab lekip Sports SBC, ler son zournalis ti ariv kot Palais des Sports, rankont Praslin Warriors/MBU Rockers ti’n deza konmanse. I ti azoute ki zot ti al laba pour filmen rankont Premium Cobras/PLS Hawks.