Praslin Segonder i domin konkour diskour kreol |30 October 2008

Zot ekspoze ti annan pour tit ‘Dir mwan ki ou sante, mon a dir ou ki ou ete’.
Dezyenm plas ti al pour lekol Belonie segonder ki ti pe koz lo tenm ‘Plant kot ou’, tandis ki dan trwazyenm plas ti lekol La Digue avek zot ekspoze lo ‘Levolisyon lavi’.

Meyer kozer prensipal ti Patricia Marie sorti Praslin, tandis ki son koleg Sharon d’Unienville ti meyer prezantater.

Pri pour Meyer Lokiter (Orater) ti al pour Virginie Hoareau sorti Belonie.
Parmi bann pri ki bann partisipan in gannyen ti larzan, liv osi byen ki triko.

Antou nef lekol lo Mahe, Praslin ek La Digue ti pran par dan sa konpetisyon.
Topik ki bann kontestan ti kapab koz lo la ti ouver e bann lekol ti annan swa size ki zot ti anvi diskite.

Tou bann lekip – ki ti konpri trwa manm sakenn - ti annan en pti dele letan pour entrodwir zot size osi byen ki fer bann oditer enterese dan sa ki zot ti annan pour dir.

Enn bann organizater sa konkour diskour, Erica Fanchette in dir ki sa lannen zot tre satisfe avek kalite partisipasyon ki zot in gannyen.

“Nivo partisipasyon sa lannen ti tre o e sa ti fer li difisil pour kapab swazir le trwa meyer lekip,” Madanm Fanchette ti dir.

Apre eliminasyon ki ti fer le 10 Oktob, lekol Belonie, La Digue ek Praslin ti kalifye koman bann finalis sa konpetisyon.