Bal Asosye i ferm rido lo 23enm Festival Kreol |03 November 2008

Sa pa’n en leksepsyon pour sa 23enm edisyon sa lannen.
Sepandan, konpare avek bann lannen presedan, olye batiman Lenstiti Kreol, sa voyaz se Sant Kominoter Pointe Larue ki ti akey sa aktivite ki ti deroul Vandredi pase.

I paret ki sa sanzman landrwa pa’n ditou afekte sa aktivite ki normalman atir en gran lafoul me in plito ogmant nivo partisipasyon.

Sete benn  «Nouvo Tradisyon» ki ti anim lasal atraver en repertwar pirman tradisyonnel.

Diferan manzay abityel tel ki moulouk ek friyapen fri ti pe osi ganny pase detanzantan e zis minwi, sa fame lasoup ti ganny servi.

Bal ti ale tou lannwit ziska gran maten Sanmdi e parey labitid, bann ki ti kapab ti tenir ziska finisyon.

Touzour Vandredi swar, en gran lafoul ti’n ralye kot Vilaz Lanmizik, Roche Caiman, pour swiv spektak lanmizik Lakadans.

    
Santer lokal Elijah pe egey lafoul pandan spektak Lakandans Vandredi swar

Plizyer artis lokal tel ki Elijah, Mercenary, John Wirtz, Patrick Victor, Dave Sinon e Extra Big ti perform akote Linzy Bacbotte sorti Moris e osi en group ki spesyaliz dan lanmizik pirman tradisyonnel sorti Larenyon.