Bazar Artizanal-Bann meyer stall i ganny rekonpanse |05 November 2008

Sa bazar, ki ti ofisyelman ouver Vandredi le 24 Oktob, ti fermen Vandredi pase, ki ti osi dernyen zour Festival Kreol.

Depi louvertir sa bazar, 7 manm ziri ti a diferan ler pas dan bann stall pour zize.
Premye kategori ti lartizana ki ti enkli bann pti manzay leze, travay lakoutir, prodwi artizanal ek ortikiltir.

Bann kriter pour sa kategori ti prezantasyon, kalite e orizinalite zot prodwi, lapros bann vander e vandez, osi byen ki dekor. Se Lydie Meme ki ti sorti konman gannyan dan sa kategori e i ti resevwar son pri avek Maria Payet-Marie, ki ti en manm ziri.

De parmi bann meyer stall

Dezyenm kategori ti labwason e sa ti ranporte par Monique Dick dan stall kokobar.  Bann kriter pour sa enn kategori ti lapropte stall, fason ki bwar i ganny prepare e servi e lapros bann ki pe servi.

Kategori final ti manze e Claudette Laporte ti meyer dan son kategori pour stall ki ziri in zize konman stall avek pli bon prezantasyon manze e osi avek bann pla byen goute.

Ti osi annan de pri adisyonnel -- enn pour plis zefor e lot pour plis inovasyon.
Restoran kanbar, ki ti pe ganny zere par lasosyasyon trwazyenm-az, ti ranport pri pour plis zefor e Robin Leste ti gannyan stall avek plis inovasyon.

Prezan kot seremoni prezantasyon pri, ki ti deroul Vandredi pase lo sit kot bazar artizanal dan karpark Freedom Square, ti Minis pour Devlopman Kominoter, Lazenes, Spor ek Kiltir Vincent Meriton, ki osi tyermenn Komite Festival Kreol.