Kominike Lapolis-En zenn-onm i ganny trouve pann dan son lasanm |23 December 2008

Se enn son ser ki ti fer sa dekouvert ver 11er bomaten. 
Dernyen fwa ki Basil ti ganny trouve vivan ti anviron 2 erdtan avan ki son ser ti trouv li anpandan dan son lasanm.
Lapolis pe fer lanket dan sa ka.

2 Pakistane i kondann 10-an prizon pour lenportasyon drog

Lapolis in raporte ki Nazish Rasheed Siddiqui, en madanm Pakistane 29-an, ek Muhammed Babar Khan, en zonm Pakistane 37-an ki ti pe voyaz koman msye ek madanm, in kondann sakenn 10-an prizon pour lenportasyon drog ilegal.

Sa 2 Pakistane ti ganny arete lo erport Pointe Larue le 30 Me sa lannen apre zot larive isi Sesel.  Zot larestasyon ti vin swivan travay konzwent ant National Drug Enforcement Agency (NDEA), lotorite ladwann avek lasistans lasante.

Swivan lanket fer par NDEA, en total 86 boulet eroin ki sa Pakistane ti’n anvale ti ganny rekipere e sezi.
Lakour in ordonnen ki letan ki sa 2 kondannen in fer lo rimann i ganny dedwir lo zot santans.  Sa i en total 7 mwan depi zot larestasyon.

Vol dan en letablisman touristik

Lapolis pe fer lanket dan en ka kot dimoun enkoni in antre dan apartman en kliyan kot en letablisman touristik dan distrik Anse Aux Pins ver 3er bomaten Dimans e vol plizyer aytenm tel ki en laptop Pro Apple kouler larzan (silver), digital camera, ipod, iphone, omwen 3 telefonn portab, bizou, eksetera.

Lapolis pe demann manm piblik ki konn okenn lenformasyon an relasyon avek sa lensidan pour pa ezite asiste zot dan zot lanket.

Viktim sa ka vol i menm pare pour ofer rekonpans larzan dimoun ki arive ede rekiper bann lobze ki’n ganny vole.