Omaz a Mis Simone Arnephy (1928 – 2009) |23 July 2009
Dan domenn ledikasyon formel, Mis Simone in ansenny dan lekol Anse Boileau, Baie Lazare e
Mis Simone ti en madanm tre kouraze ki ti mentenir en nivo disiplin tre o dan tou sa ki i ti fer.
I ti toultan devoue dan sa ki i ti fer e fer sir son aksyon i byen e dan lentere son bann koleg travay. Koman en direktris lekol, Mis Simone in fer tou keksoz posib pour fer avanse son lekol dan tou domenn. I ti travay pre avek bann ansennyan pour ed tou zanfan devlope.
Mis Simone ti osi remarkab pour zefor ki i ti mete dan devlopman nou kiltir, sirtou dan domenn sosyal, spirityel e dan ladans tradisyonnel.
Zabitan Anse Boileau ki enpe pli aze a rapel ki pandan plizyer lannen Mis Simone ti zwe lorg dan legliz laparwas e i ti menm montre lezot koman pour zwe sa lenstriman mizikal.
Distrik Anse Boileau in toultan renommen pour nou ladans tradisyonnel e Mis Simone ti en pilye dan devlopman ladans kanmtole, en lafors par deryer sikse son distrik dan plizyer konpetisyon ladans tradisyonnel lo nivo nasyonal. Letan ki Mis Simone ti devoue pour montre bann zenn Anse Boileau dans kanmtole i ankor pe raport fri akoz se zisteman bann zenn sa lepok ki ozordi pe kontiny sa travay Anse Boileau, osi byen ki dan lezot distrik.
Travay sosyokiltirel Mis Simone lo nivo distrik ti enkli montre zanfan bann bon fason viv e devlopman sa bon lespri kominoter, kot i ti toultan organiz bann group pour travay volonterman dan son distrik, pour ed bann vyeyar osi byen ki bann zenn.
“Mis Simone ti en madanm for, egzanpler, kouraze, avek bokou pasyans,” i lafason ki en koleg ti dekri li.
Minister Ledikasyon i dir Mis Simone en gran mersi pour son devouman ek son gran kontribisyon dan ledikasyon nou pep. Nou prezant nou kondoleans avek lafanmir ki’n siport sa edikater kouraze, egzanpler dan son karyer.