24enm edisyon Festival Kreol-Praslin segonder i venker konpetisyon kwiz kreol |30 October 2009

Sa lekip ti skor 30 pwen, 6 an plis ki lekip sorti lekol segonder Pointe Larue ki’n sorti dezyenm.

Koman pri, lekip sorti Praslin ti resevwar en lo liv kreol ek 1000 roupi prezante par Minis pour Devlopman Kominoter, Lazenes, Spor ek Kiltir Vincent Meriton.

Lekip sorti Pointe Larue segonder, ki ti konpri Josie Richard, Anthea Sinon, Mervin Zarine e Paul Gedeon, ti resevwar en lo liv kreol ek 800 roupi prezante par sekreter prensipal pour Lazenes, Spor ek Kiltir Denis Rose.

Trwazyenm pri 500 roupi ek en lo liv kreol ti al pour lekol segonder Mont Fleuri, e sa pri ti prezante par direkter zeneral pour Kiltir Raymonde Onezime.

Madanm Onezime ti osi prezant sertifika avek tou bann lekol ki ti’n partisip dan staz eliminsayon sa konpetisyon.

Paul Gedeon, sorti dan lekip Pointe Larue segonder, ti ganny pri pour partisipan ki ti donn plis larepons korek dan sa final tandis ki Michel Both ti gannyan menm pri dan bann sesyon eliminatwar. Zot ti resevwar pri larzan, dinen dan lotel ek ekskirsyon ofer par diferan lazans voyaz.

Konpetisyon kwiz kreol – ki en aktivite anyel dan kad Festival Kreol -- ti divize an trwa parti. Pandan premye parti bann partisipan ti bezwen reponn kestyon baze lo lalang ek literatir kreol. Dezyenm parti ti dedye a zedmo, proverb, lekspresyon kreol ek mers lontan tandis ki kestyon trwazyenm parti ti baze lo kiltir ek listwar Seychelles ek konnesans zeneral.