7 dimoun i admit lopital swivan de aksidan |03 May 2010

Dapre en kominike lapolis, premye aksidan ti ganny raporte Beau vallon ver 7.16 diswar kot en manman ek son zanfan ti ganny tape avek en loto. Kondisyon sa madanm, ki dan ICU, in ganny dekri koman kritik tandis ki pour son pti garson 5-an ki lo ward zanfan i stab.

Dapre rapor, sa de viktim ti pe koup semen sorti borlanmer letan ki en loto sorti direksyon Beau Vallon pe al Bel Ombre ti tap zot dan zanmerant diskotek Tequila Boom.

Dezyenm aksidan ti ganny raporte 3 minit plitar lo highway ant erport ek pon Cascade kot en pick-up avel 7 pasaze an kontan drayver ti perdi kontrol, sorti lo son kote semen letan i ti pe desann ver lavil, kraz en crash barrier epi savire lo lot kote semen ki mont direksyon erport.

Dan sa aksidan 5 dimoun in admit lopital, parmi en madanm dan ICU ki son leta in ganny dekri koman kritik.

Apard sa de aksidan, lapolis in rikord en trwazyenm kot en loto ti kit semen e tonm dan ros dan zanmerant Maravi Sanmdi bomaten. Sa de dimoun ki ti dan sa loto pa’n ganny dimal serye.

Swivan sa bann kalite aksidan ki’n arive pandan sa wikenn festivite, lapolis pe ankor enn fwa demann motoris koman pyeton pour pran bokou plis prekosyon e responsabilite letan zot pe servi larout piblik.