Lardwaz i lans liv Read Me My Rights |24 June 2010

Seremoni lansman liv Read Me My Rights ti asiste par plizyer envite

Sa liv i en proze ki’n ganny realize par lasosyasyon bann ekriven apele Lardwaz.

Prezan kot seremoni lansman sa nouvo piblikasyon ti Minis pour Devlopman Kominoter, Lazenes, Spor ek Kiltir Vincent Meriton, direkter Lenstiti Kreol Penda Choppy ek tyermenn lasosyasyon biblioteker Marylyn Henri.

Osi prezan ti nouvo tyermenn Lardwaz Marie Clarisse ek ansyen tyermenn Marguerite Pillay osi byen ki bann manm sa lasosyasyon parmi lezot envite.

Dan son ladres, Madanm Henri ti dir ki liv ek lektir i tre enportan pour devlopman en pep.
I ti dir ki avek teknolozi, bann bibliotek osi in avanse pour permet bann lekter ganny plis lenformasyon.
“Lenformasyon i devret ganny met dan en fason ki tou popilasyon i devret ganny akse avek menm pour bann ki pa kapab lir,” i ti dir.
I ti azoute ki biblioteker ek bibliotek pa devret war bann nouvo teknolozi lenformasyon koman en menas.

Madanm Clarisse ti dir ki sa liv i en koleksyon travay pour zanfan e i reflekte zot drwa. I osi annan ilistrasyon ek difereran zistwar ek poenm osi byen ki sanson an kreol, angle ek franse.

I ti azoute ki Lardwaz ti ganny lasistans ek Progranm Devlopman Nayon Ini (UNDP) pour sa proze e osi led sorti kot Lenstiti Kreol ek bann artis e ekriven lokal.

I ti fer resorti ki in pran zot apepre nef mwan pour konplet sa proze e zot in osi rankontre enpe difikilte ek bann ekriven.
Sa liv 47 paz avek bokou ilistrasyon i kout R150.
Bann manm egzekitif sa lasosyasyon osi byen ki bann manm Lardwaz ti osi siny detrwa sa bann liv.

Sware ti termin avek resital ekstre sorti dan bann liv ki’n fek lanse e nouvote par bann manm Lardwaz ek lezot ekriven.
Poet lokal Raspyek ti osi la pour anim lasware avek son poenm ‘Larzan’.