Konpetisyon ‘Distrik pli prop’-Grand Anse Praslin i gran venker |20 September 2010

Bi prensipal sa konpetisyon se pour motiv tou distrik dan Sesel pour gard en lanvironnman prop e zoli e osi promouvwar bon zestyon salte.

Konpetisyon in ganny zize par en group ziri endepandan e osi Lazans pour Lanbelisman ek Zesyon Salte (LWMA).
Parmi bann kriter ki’n ganny servi se lafason ki bann zabitan i konstaman gard en nivo lapropte lanvironnman ek lanbelisman e osi lafason ki bann bin i ganny servi e mentenir.

Bann venker sa konpetisyon ti resevwar zot pri pandan en seremoni ki ti deroul Vandredi apremidi kot sant kominoter Roche Caïman.

Sa levennman ti asiste par Minis pour Zafer Enteryer, Lanvironnman ek Transpor, Msye Joel Morgan ; Minis pour Devlopman Kominoter, Lazenes ek Spor, Msye Vincent Meriton ; Minis pour Devlopman Sosyal ek Kiltir, Msye Bernard Shamlaye ; parmi lezot envite.

Koman gran venker, distrik Grand Anse Praslin in resevwar en trofe e osi R10,000.

Dezyenm pri sa konpetisyon -- en trofe ek R5,000 -- in al pour distrik Grand Anse Mahé.

Koman gannyan trwazyenm pri, distrik Port Glaud in resevwar en trofe ek R3,000.

Letan i ti pe adres bann ki ti prezan, Minis Morgan ti fer resorti ki i annan en gran progre remarkab ki’n ganny fer dan bann distrik par bann pti kontrakter pour netwaye e anbelir nou pei.

I ti azoute ki son minister i rekonnet sa bann zefor kolektiv ek travay ki pe ganny fer toulezour. I ti toudmenm azoute ki i ankor annan plas pour progre ek nouvo devlopman. Sa, i ti dir, pou depan bokou lo zefor sak endividi.
Konsernan sa konpetisyon annyel, Minis Morgan ti dir ki i devret enspir lafyerte tou zabitan ek lotorite sak distrik pour met plis zefor ek lentere dan amelyorasyon labote ek lapropte nou pei.

Pour terminen, Minis Morgan ti fer rapel ki kanpanny netwayaz lemonn pa devret le sel enstans kot lapopilasyon i pran lapropte, netwayaz e lanbelisman lakominote aker. I ti dir ki sa i devret plito en travay toulezour, pour byennet nou lendistri tourizm e pei an zeneral.