Bazar ek Izolasyon – De nouvo pyes teat byento lo lasenn |09 October 2010

Sa de pyes, avek tit Bazar ek Izolasyon, in ganny inisye par Konservatwar Nasyonal pour Lar an kolaborasyon avek komite organizater Festival Kreol anba direksyon Kurt Lagrenade.

Sa de pyes, ki bann komedi, pou zwe pour premye fwa toulede ansanm Vandredi le 22 Oktob apartir 7er diswar dan Sant Konferans Enternasyonal.

Bazar i rakont lavi trwa vander dan en bazar e bann sitiasyon pozitiv e negativ ki zot rankontre.
Sa pyes, ki son dirasyon i en pe mwens ki 60 minit, i osi montre kwa ki arive letan zot napa kliyan e osi zeneralman lavi dan bazar.

Izolasyon, ki dire pour apepre 30 minit, i rakont en group dimoun ki’n pri lo en zil dezerte e pe viv laba pour plizyer mwan. Apre ki zot ganny frape par en trazedi, sa pyes i gradyelman montre ki laras imen i annan kapasite pour fer ler in dezespere, an fas avek bann sitiasyon plito ekstrenm.

Bann akter ek aktres dan sa de pyes i en group zenn ki pe swiv laklas teat kot Konservatwar e ki’n resaman swiv en pti seminar avek en akter Britanik apele Dominic Cooper.

In pran sa group apepre trwa mwan pour met ansanm sa de pyes, me bann akter in travay lo zot bann teknik teatral pandan sa dernyen lannen.

Parmi bann teknik lo ki mannyer pour perform lo lasenn, zot ti osi aprann en stil pyes teat apele Komedi de Larte.

Tiket pour sa de pyes i anvant kot Konsey Nasyonal pour Lar, e manm piblik i kapab aste ou met rezervasyon kot Konservatwar Nasyonal pour Lar an personn ou lo nimero telefonn 722675.

I.H.