Pyes mizikal Kreol An Abondans i reviv kiltir kreol dan lakominote |06 November 2010

Gran premyer sa pyes, ki’n ganny met an senn par Raymond Clarisse e performen par Mahe Chamber Choir, ti deroul kot Sant Konferans Enternasyonal Mardi le 26 Oktob dan kad bann aktivite pour mark 25enm Festival Kreol ki fek terminen resaman.

Msye Clarisse i apel sa pyes “en lannwit fou dan kreolite, ki montre bann diferan karakteristik lavi kreol.”

Sa pyes i osi rakonte ki mannyer zonm ek fanm i viv, ban diskor ek rekonsilyasyon, lanmizman ek bann moman eksitan.

Pandan ki piblik pe dizer sa bann diferan laspe lavi Kreol, zistwar i montre bann deroulman dan lavi en zenn fiy apele Jasmine ek en zenn garson ki apel Leonard, ki tonm anmoure ek kanmarad. En lanmour fou, en lanmour total, me osi en lanmour defandi, akoz gran frer Jasmine, apele Aldrick, i totalman kont sa, e i fer tou sa ki i kapab pour anpes lanmour sa de zenn epanouir.

“Kreol An Abondans” i osi tit sanson par Raymond Clarisse ki ti ranport premye pri dan konpetisyon sanson pour Festival Kreol 1998.

Msye Clarisse i azoute ki lafason ki bann sanson i ganny enterprete dan sa pyes i plito en stil ki Seselwa e menm lezot zilwa i sant avek. I osi annan son laspe vizyel, atraver bann klip video.

Kreol An Abondans pou rezwe tanto dan Sant Konferans Enternasyonal aparti 7er diswar. Tiket i kout R85.

I.H.