Zenn Fondasyon Jj Spirit i ekspoz zot talan artistik |16 November 2010

Aktivite Dimans ti en lokazyon pour bann zenn ekspoz zot talan dan diferan form lar 

Sa aktivite ti deroul pandan lazournen Dimans anba Independence House e lo Laveni Lendepandans.

Sete direkter egzekitif sa fondasyon, Eddie Charles, ki ti ofisyelman lans sa aktivite dan prezans Minis pour Devlopman Sosyal ek Kiltir Bernard Shamlaye, sekreter prensipal pour Lazenes ek Spor Denis Rose, sef egzekitif Konsey Nasyonal pour Lazenes Edith Alexander.

Dan son ladres, Msye Charles ti dir ki ti swe patron sa fondasyon, Prezidan James Michel, pour bann zenn eksplor diferan form lar.

Prezidan Michel, ki pa ti dan pei sa zour, ti osi anvoy en mesaz felisitasyon ek lankourazman pour sa bann zenn.
Msye Charles ti dir ki bi sa aktivite se pour promot diversite kiltirel ek talan bann zenn.

« Sa leksplozyon artistik lazenes i sa platform pour bann artis aspiran e devoue pour kapab ekspoz zot talan dan diferan form lar, » i ti dir.

I ti dekrir sa levennman koman en leksplozyon vivan ki demontre kreativite ek talan sa zenn zenerasyon
« Fondasyon Jj Spirit pou kontinyen motiv lazenes pour zwenn sa lorganizasyon pour ki zot devlop sa sans responsabilite, rezilyans ek realism, » i ti azoute.

I ti profite pour lans en lapel avek lazenes Seselwa pour zwenn progranm sa fondasyon tel ki Young Spirit pour bann ki annan mwens ki 18-an, Young Talents pour bann zenn ki annan talan artistik, Young Caucus vize ver lekselans akademik e Young Volunteers pour bann zenn ki anvi volonter lo bann aktivite fondasyon.

I ti azoute ki Fondasyon Jj Spirit pou osi eksplor bann nouvo linisyativ tel ki en lazans ladans ek lanmod e en Jj Spirit Foundation Brigade ki pou annan rol enportan dan byennet Sesel e tou Seselwa.

Fondasyon Jj Spirit pe swete ki leksplozyon artistik lazenes i vin en levennman annyel kot lezot stil lar pou ganny enkorpore dan prosen edisyon.

Joel  Bacco, responsab relasyon piblik kot sa fondasyon, i dir ki dat pour lannen prosen pou ganny deside plitar vi ki i annan plizyer fakter ki bezwen ganny konsidere avan.

Apre seremoni louvertir bann ki ti prezan ti ganny sans vizit bann travay dan en legzibisyon tablo e travay artizanal fer par bann zenn.

Pandan sa lazournen manm piblik ti ganny sans vwar e apresye talan bann zenn atraver resital poenm, komedi, ladans, animasyon an servan lenformasyon teknolozi, lanmizik ek defile lanmod.