Tou dan son trwa roz |13 January 2011

I annan en bon pe letan depi ki sa zenn madanm pe fer demars pour li met debout son prop pti biznes. In persevere e in gard lespwar malgre bann peryod difisil.

Ozordi, malgre avek ankor serten konstrent, sa zenn madanm in reisi ganny en landrwa pour fer marse son biznes.

“Mon’n met tou sa ki mon ti annan dan mon biznes,” i ti dir Mardi letan i ti pe rakont Prezidan James Michel bann demars parfwa difisil ki in bezwen fer avan ki in ariv la kot i ete e serten lezot difikilte  ki i ankor pe fer fas avek ozordi.

Byen fyer, i ti montre Msye Michel ek son lekip ki ti pe vizit sa distrik, tou bann lenvestisman ki in fer dan bann nouvo lekipman pour fer marse son biznes.

Madanm Rose ti profite pour port a latansyon Msye Michel ek tou bann zofisye konsernen tou son bann konsern ek difikilte.

Madanm Rose i annan bokou proze e plan pour plis devlopman e lagrandisman son biznes.

Msye Michel i dir ki bann lenvestisman koumsa i devret ganny tou lankourazman posib.