Kominike Lapolis |11 June 2011

Sa sispe, ki reste Union Vale, i aze 36-an e non pa 32-an parey lapolis ti’n anonse oparavan.
I ti ganny arete Plaisance Mardi bomaten.
Msye Vidot ti ganny dekouver mor dan lakaz kot i ti pe reste Union Vale Sanmdi ver 5er apremidi.

**********

Lapolis in osi raporte ki rezilta letopsi fer lo lekor Gilbert Carolla in demontre ki sete en kriz kardyak ki’n koz son lanmor.
Carolla i sa zonm 47-an sorti St Louis ki ti ganny ranmase dan lanmer lo slip kot por lapes Dimans bomaten.

**********

En zonm 37-an ki reste Lari Hangard in pas ankour yer bomaten kot in ganny sarze e pled koupab pour lofans kas batiman avek lentansyon pour vole. Sa akize ti ganny arete Zedi pour sa lofans komet mwan pase Lari Hangard menm. An kometan sa tel lofans sa akize ti’n kas en kondisyon ki lakour tin enpoz lo li oparavan an relasyon avek en lot ka vol. Lakour yer in alor rimann li ziska le 22 Zen zour ki santans pou ganny pase lo li.

**********
Lapolis in raporte ki en madanm 40-an ki reste St Louis in ganny sarze pour konportman dezordonnen dan kordgard e osi pour reziste larestasyon, lofans komet dan kordgard santral Zedi.
Sa akize ki’n ganny large pou repas ankour le 24 sa mwan, zour ki i pou plede.