Laserenad … en selebrasyon kreolite dan tou son splander |28 October 2013

Victoria ti’n abiy dan en lenz miltikolor pour sa 28enm Festival Kreol Sanmdi apremidi pandan ki bann zanfan, zenn e sa ki pli vye ti pe fer li valse dan en laserenad byen kolore e ritme.
Lanmour ek lafyerte pour nou kiltir ek tradisyon ti pe ganny byen demontre e nou kreolite ti pe ganny selebre dan tou son splander.

Sa laserenad ti pe reflekte nou fason viv, anmize, zwe, nou bann bon valer, bann eleman enportan e inoubliab dan nou kiltir ek leritaz.
Laserenad ti demar dan Stad Popiler e bann partisipan ti fer letour kot Moniman Linite, Lari Francis Rachel ziska kot Lorloz.

Kot finisyon bann zenn ti demontre zot talan dan ladans tradisyonnel otour Lorloz.
Zot ti danse, sante e fer bann ki ti’n desann pour vin regarde reviv bann lemosyon ki demontre nou lafyerte koman en nasyon kreol e bann moman dan lepase.

Laserenad ti demar avek group sorti Lenstiti Kreol e ti swiv par lezot ki ti’n abiye dan bann lenz tre kolore, bann lenz tradisyonnel. Ti osi annan bann ki ti’n servi materyo resikle e osi sa ki trouve dan nou lanvironnman tel ki fey koko ek tanmi pour fer zot lenz avek.

Ti osi annan bann ki ti pe fer nou reviv bann zwe ki bann zanfan dan lepase ti zwe tel ki zwe larou me ki konmela in preski disparet.
Bann sanson popiler e byen ritme tel ki Lerwa Sega par Patrick Victor e Telelang par José Bonne ti pe rezonnen dan lavil e ti pe met sa bon lanbyans.

Minister Lasante, Korporasyon Transpor Piblik, group Neighbourhood Recreational Activities, Seychelles Trading Company, lekol Letid Avanse (Sals), departman ladministrasyon piblik dan biro Prezidan ek Lotorite Laviasyon Sivil, bann diferan group sorti dan bann distrik osi byen ki Maurice ti parmi bann ki ti pe pran par dan sa laserenad sa lannen.

Minis pour Tourizm ek Kiltir Alain St Ange ti osi viv son kreolite ler i ti zwenn bann zenn pour dans en pti morso ladans tradisyonnel.
Nou seri portre tire par fotografer Patrick Joubert i montre en pe lanbyans pandan laserenad.