Festival Kreol: Zenn stilis i montre zot talan dan ‘Fon Lanmal’ |28 October 2013

Se vreman en selebrasyon talan ki 7 zenn stilis sorti kot Lekol Lar Vizyel ti ofer piblik kot Lotel Berjaya Beau Vallon Bay Sanmdi swar dan defile lanmod ‘Fon Lanmal’.

Sa 7 stilis – Diletta Jupiter, Gretel Jeannie, Nathaniel Legaie, Charlette Jeannie, Petra Richard, Engie Gertrude e Mifa Moumou – ti prezant diferan koleksyon kolore bann lenz sware, sorti e laplaz pour zonm ek madanm.

Sa bann resanz enspire par diferan tenm parey fler, pye koko ek soley kouse, ti reini senplisite, modernite e orizinalite lanmod Seselwa.

Merina Accouche, ansennyan lanmod kot Lekol Lar Vizyel e ki’n osi form sa bann zenn stilis, ti avek lasistans en lot zenn ansennyan, Freancheska Mousbe, aport en dimansyon ekstra a sa defile avek en koleksyon tout an blan ki zot in apel ‘lape’. Ou plito, zot ti devret apel li ‘lanmour’ akoz i ofer lenz pour nouvo ek nouvel marye.

Pour rann lasware pli elektrik, animasyon ti asire par bann zenn artis Seselwa –  Sandra, Travis, Angèle e T-Tray.

Pour rezimen, ti en spektak otman artistik dirize par Emmanuel d’Offay, menm si lanmizik ti paret tro for e limit konsantrasyon, e bann mannken ti tro souvan manke pour montre en pti sourir Kreol.

Alafen sa sware ki apard Berjaya Beau Vallon Bay ti’n sponsorize par Mauritius Commercial Bank, Airtel e Seychelles Breweries, Minis pour Tourizm ek Kiltir, Alain St Ange ti prezant tou bann zenn stilis avek en pti rekonpans e tokenn lapresyasyon.

Nou seri portre tire par fotografer Louis Toussaint i montre bann mannken pe parad dan bann resanz kree par sa bann zenn stilis ki dan en portre souvenir (anba paz) avek Minis St Ange ek sekreter prensipal pour kiltir Benjamine Rose.