Festival Kreol : Tifin |29 October 2013

En koup Alman i eksperyans maryaz tradisyonnel Seselwa

En koup Alman ki lo zot ‘Lune de Miel’ isi Sesel, ti ganny sans marye ankor enn fwa me safwasi dan fason tradisyonnel Seselwa.

Sa ti atraver aktivite Tifin dan kad 28enm Festival Kreol  ki ti deroul Dimans pase dan sant kominoter  Beau Vallon.

Tifin ti konmans avek laserenad kot tou bann envite ti mars deryer nouvo ek nouvel marye -- Jasmin ek Axel Geppert --  ki aparaman ti’n fek marye dan zot pei de trwa semenn avan.

Ti pandan ki zot ti pe pas zot ‘Lune de Miel’ isi ki Bord Tourizm Sesel (STB) ti apros zot pour demann zot pour partisip dan aktivite Tifin.

Nouvo ek nouvel marye ti ganny akeir avek laplodisman dan en lasal vert ki ti’n ganny dekore avek fey sagou ek fler vilea.  Manm lasanble pour distrik Beau Vallon, Mirena Souris, ti osi prezan parmi lezot envite.

Msye ek Madanm Geppert ti dir ki zot ti enpe ezite pour aksepte sa lenvitasyon pour partisip dan en tel aktivite vi ki zot pa ti tro sir kwa ki zot pou ekspekte, me parkont zot pa regrete akoz i’n en leksperyans ki zot dir zot pa pou oubliye.

Zot ti menm dir ki zot santi zot zwaye pour ganny sa loner pour eksperyans tradisyon Seselwa dan sa fason.

Bokou dimoun ki ti prezan dan sa aktivite zot dir ki zot veye sak fwa ki sa aktivite i ganny organize pour zot aste zot tiket. Enn parmi bann envite ti Jane Cecile : «Mwan tou le lannen mon fet Festival Kreol o maksimonm akoz mon ganny mon lanniverser dan mwan Oktob e mon fer li mon lafet ; mon al tou bann aktivite ki mon kapab, e mon byen apresye Tifin akoz i fer mwan mazin letan pase.»

Parmi bann aktivite ki ti annan dan Tifin ti diskour, sant romans, koup gato, fer en pti lasante e sa ki ti pli  entans se ler nouvo ek nouvel marye ti ouver lasal.

E byensir parey tradisyon nouvo ek nouvel marye ti bezwen ki lasal ler minwi ti sonnen !