Jakim i promet son bann fàn en bon spektak |19 February 2014

Bann artis popiler i reini pour en dezyenm fwa sa lannen pour en spektak ki promet ankor pli enpresyonan ki sa enn avan.

Premye spektak ki ti pran plas an Zanvye 2014 ti montre bann organizater ki bokou demann pa’n ganny reponn vi ki tiket ti fini boner.

Jakim, ansanm avek Taniah, Elijah, Ion Kid, Sandra, T-Tray, Zion I, Chicco, Regi, Eazy-D Tha Hyperman, Ras Ricky, e Marathon akonpanyen par benn Paradise i annan plezir anonse ki le 1 Mars aparti 9er diswar pou annan en veritab ‘dife lo island’.

Sa konser pou deroul kot mini stad La Promenade ki permet akey en pli gran kantite dimoun e bokou plis lespas pour danse. Tiket i kout 100 roupi e pou anvant kot Dams Enterprise ek Upgrade Night Club.

Sa spektak i dernyen spektak lo Mahé avan ki sa group artis i al lo zot tournen dan bann zil pros.  Jakim i oule les tou dimoun konnen ki tiket pa pou vann kot laport e ki i vreman enportan pour aste zot tiket boner semenn prosenn.

Jakim i oule remersye tou dimoun ki’n fer li posib pour li kapab resevwar de pri dan Cable Tunes Awards lannen pase.

I ti dir ki sa levennman i osi en sans pour artis lokal esey anmenn zot lanmizik lo nivo enternasyonal  e sipor zot bann fàn i ede pous zot ankor pli pre ver zot rev, menm lo nivo finansyel.

A. A.