Sandra i lans son 3enm albonm |21 June 2014

Sakenn de nou, nou annan nou prop santiman e Sandra in deside eksprim sa ki pour li atraver sanson lo son 3enm albonm ki i ti lanse le 10 Zen.

Sa albonm, ki annan pour tit ‘Mon Santiman’, i konpri 12 sanson parmi 8 orizinal. Lezot 4 sanson, Sandra in resante. Parmi sa 4 sanson, 2 ti sante orizinalman par John Wirtz. Sa i ‘Kot ou pou anmennen’ ek ‘Zil Mae’. Sa lot 2 i sanson ki ti ganny sante par David Scholastique e zot annan pour tit ‘Si demen nou separe’ ek ‘Portre nou zoli portre’.

Laranzman lanmizik pour sa 4 sanson in ganny fer kot Relations Studio ek Seysound Studio.

Sa 8 nouvo sanson in ganny ekri par Michael ‘Ion Kid’ Savy ek Martin Lebon e laranzman lanmizik ek lanrezistremen in ganny fer kot Blood Line Studio.

Bann sanson i baze lo sitiasyon lanmour e i osi annan bann konsey lo lanmour.

Prodikter Sandra, Patel Esparon, ki osi papa sa artis, ti dir avek zournal Nasyon : «Nou pe mazin al lans sa enn albonm Moris e isi i pou tou depan lo lavant, e si lavant i bon nou pou fer en spektak.»

Konsey Nasyonal pour Lar, Lasosiasyon Mizisyen Sesel (Seymas) ek Sosyete Konpoziter ek Oter Sesel pe touzour ankouraz dimoun pour donn sipor bann artis lokal e pe demann zot pour aste orizinal.

Albonm i anvant dan bann landrwa labitid e i kout 125 roupi e dan lanmen i kout 100 roupi.

B. D.