Madanm Pouponneau i selebre son 102enm lanniverser |25 August 2014

Bokou dimoun i swete ariv 102an me arive vwar sa zour kot ou ankor kapab koze e lir dan plizyer langaz i en lagras.

Madanm Margaret Woodfield Pouponneau ti selebre son 102enm lanniverser Vandredi le 15 Out avek en lanmes kot son lakour. Sa lanmes ti ganny prezide par Reveran Ramkalawan dan prezans manm elekte dan lasanble nasyonal pour distrik St Louis Herbert Houareau ek ladministrater distrik Rachel Joseph.

Bann zanfan Madanm Pouponneau ki Sesel, son pti zanfan, aryer pti zanfan e son bann nyes ek neve ti osi prezan.

Sa madanm, ki ankor ase for, ti reponn kestyon zournalis limenm ansanm avek son fiy ki reste avek li.

Madanm Pouponneau ti ne Anse Royale le 15 Out 1912 dan en fanmir 7 zanfan. I annan 4 frer ek 2 ser me malerezman zot tou zot in fini mor.

Par profesyon i ti en ansennyan langaz.

Apre son maryaz i ti arete fer lekol e ti konsakre son letan pour okip son lakour ek son 5 zanfan -- 4 fiy ek 1 garson. Malerezman son premye fiy in fini kit nou.

Pandan son letan kot  lakour i ti devlop lentere dan koud e se la ki Madanm Pouponneau ti vin renonmen dan distrik St Louis koman ‘en gran modis’. In koud depi lenz maryaz ziska liniform depandan lo komann ki i ti ganyen.

Sa madanm, ki ankor mazin preski tou keksoz, ti dir ki son msye ti mor 32-an pase.

I ti fer remarke ki i pa’n fer nanryen spesyal pour li ariv sa laz.

“Zis mwan dan fanmiy ki’n ariv sa laz, mon manman ti mor a laz 98-an.”

Konmela i pas son lazournen anba son lavarang kot i lir son labib e fer lapriyer. Fodre fer remarke ki i osi en manm Mothers’ Union Branch ki tonm anba dyosez Anglikan. I ti zwenn sa group depi son kreasyon dan bann lannen 1900 ziska ozordi. Vi ki i pa tro kapab deplase bann rankont sa group i fer kot son lakour. Sa group i al vizit bann dimoun aze, vizit lopital, prizon e osi bann nursing homes.

Pour ed li Madanm Pouponneau i annan en carer dan lazournen e se son dezyenm fiy ki reste avek li ki vey li larestan letan.

Malgre ki i ti kit son distrik pour en pti peryod letan, laplipar son lavi in deroul  dan St Louis.

Madanm Pouponneau ti osi azoute ki i napa “okenn regre”.

«Mon’n vwayaze,mon’n elev mon fanmir, mon’n toultan annan en bon lasante. Sel fwa ki mon ti al lopital ti pour mon lizye, apre mon pa’n zanmen malad. Mon ti donn nesans mon bann zanfan kot mwan avek led fanm saz,» i ti dir.

Son sel dezapwentman se ler i get lafason ki lemonn pe ale e sa i fatig li en kantite.

I ti termin nou antretyen an dizan: “What is wrong will always be wrong and what is right will always be right.”