Festival Kreol : Fon Lanmal - Nashyia Rosalie e Thyra Zialor i ranport Konkour Zenn Stilis |03 November 2014

Avek zot koleksyon enspire par kouler dife ek lanbyans moutya e ki zot in apel ‘Rythm’, Nashyia Rosalie e Thyra Zialor i gran venker Konkour Zenn Stilis ki organize sak lannen dan kad Festival Kreol e ki ouver pour bann etidyan tekstil dan Kolez Lar.

Sa koleksyon, ki kapab vin bann zoli kostim spektak, ti prezante pandan defile lanmod ‘Fon Lanmal’ Vandredi swar dan Sant Konferans Enternasyonal (ICCS) ansanm avek dis lezot koleksyon lenz zonm ek madanm ki ti pe partisip dan sa konkour.

I paret ki ziri ti enpresyonnen par tenm ki sorti dan foklor Seselwa e ki ti paret domin lasware. Akoz dezyenm pri ti al pour en koleksyon apele ‘Sega fleri’, kree par Isabella Louise e Sharita Fred. Sa de zenn stilis in kre en lanbyans lazenes avek en lenpresyon mouvman leze me elegan, avek en bann fler ki ou a krwar i fleri tousel !

Trwazyenm pri ti al pour en lot koleksyon enspire par fler - safwasi fler potao, e ti egalman evok ritm ek mouvman. Zot kreater Annabelle Dugasse e Maria Barbe ti’n swazir kolaz, papye mashe ek lapentir byen kolore pour fabrik en bann kostim fantezist ki zot ti’n apel ‘File file’.

En lot koleksyon ki ti enspire par foklor ek tradisyon se ‘Reviv sa letan’, travay Gabrielle Cesar e Rebecca Sinon ki remet an valer zedmo ek zez. Le de artis i zwe avek en konbinezon bann ron ek laliny orizontal e vertikal kouler gri, zonn e oranz ki zot in aplik lo en fon blan. Rezilta se en lenpresyon fler an mouvman konmsi zot pe danse !

Serten lezot stilis ti’n swazir pour zongle avek en konbinezon ant lar ek lanatir. Parey Petra Richard ki’n fer danse losean lo en seri teni sware. ‘Ladans losean’ i evok lavi mouvmante anba lanmer atraver bann zigzag ek volan kolore ki anmenmtan reprezant vivasite ek laliberte.

Kant a Angie Gertrude, in dan en zwe avek mo fer makapo gran fey vin ‘Makalapo gran fey’ pour donn en bann laliny kolore e armonye, parey kou-d-penso parfe en gran pent natiralis ki penn baton e fey friyapen. Parey i’n melanz makapo ek makalapo, Angie in reisi prodwir e montre kot a kot en mini tropikal e en maksi oriantal, tousala dan en kontras enpresyonan.

Fey, sa fwa si fey banann,  i reste prezan dan ‘Kouler tropik’ ki pour Clara Melanie i ver, zonn e gri melanze dan kwen tapi. En stil kolore, atiran, elegan e alafwa repozan ki montre lekstravagans lazenes pa zis dan zip volan, me osi dan kannson volan !

Kiryezman, torti dan travay Francisca Mousbe i paret ‘Pti pa pti pa’ vin pre avek fey friyapen e fey banann, dan azar en parfe larmoni lanatir. Bann laliny lo son karapas i kre en elegans rar dan en konbinezon bann kouler sonm : larzan, mov ek nwanr. E parey torti ki zanmen kasyet son karapas, bann mannken i kit zot ledo deor !

Me pa zis torti ki manz friyapen ek banann, sousouri tou. Se sa ki Kursha Antoine e Sania Pillay i montre dan koleksyon sonm ‘Mister lannwit’, kot tou pe paret kasyet dan fernwanr. Dan en sanzman oze, menm nouvel marye in met en rob nwanr.

Ki meyer fason fer kilmin lakor ant lanatir e kiltir ki zisteman dan ‘Larmoni’ Natalie Lavigne e Liza Morgan! Zot kre en koegzistans parfe ant zannimo, pwason ek plant dan en koleksyon lenz e akseswar lans.

Finalman, senp e inosan dan zot kouler blan, Laureen Francourt e Valentina Reginald i fer nou rapel ki nou ‘Legzistans’ i depan lo nou lanvi e kapasite pour prezerv nou leritaz kiltirel e natirel. Sa i osi pas par nou linite dan sovgard nou diversite, parey Fon Lanmal 2014 in paret montre.

Sa defile lanmod ti osi vwar partisipasyon de stilis sorti Rodrigues e trwa lezot stilis Seselwa. Zot ti ofer lodyans en gou modernite dan kreolite avek nou bann zanset sorti Lafrik ki’n redebarke dan brodri kannson bretel. Ti osi annan animasyon ofer par poet Raspyek, santez Jany e bann etidyan Lekol Lar Vizyel.
 
Minis pour Tourizm ek Kiltir, Msye Alain St Ange, in dir ki nou devret devlop bann zenn dan lar lanmod e in lans lapel pour ed zot kapab fer karyer dan sa domenn.
« I nou bann zenn ki pe fer perse koman bann zenn stilis, donn zot tou lankourazman », Minis St Ange ti konklir.

Serten bann mannken pandan defile Vandredi swar