Lotorite Lapes Sesel pe revwar konsesyon ki peser i gannyen |06 November 2014

Fas a logmantasyon dan pri pwason ki en gran konsern pour piblik ek lotorite konsernen, Lotorite Lapes Sesel (SFA) pe fer en letid pour vwar si bann konsesyon ki peser i gannyen i ankor relevan.

Me dan limedya napa gran keksoz ki lotorite konsernen avek lapes i kapab fer pour fer pri pwason desann vi ki napa pri kontrol lo sa komodite e ki se selman demann ek marse ki determin son pri.

Ti Minis pour Resours Natirel Peter Sinon ki ti donn sa bann presizyon ler i ti pe reponn kestyon dan lasanble Mardi bomaten.

Manm elekte pour Pointe Larue, Jennifer Vel, ti demann Minis pour Resours Natirel si SFA i konsernen avek nivo pri ek levolisyon dan pri pwason e ki mezir i anvizaze pran pour remedye sa sitiasyon.

Minis Sinon ti eksplike ki parey tou dimoun SFA  ek son minister zot osi tre  konsernen avek pri pwason, ki en komodite enportan pour nou ladyet, me ki napa bokou ki lotorite i kapab fer dan limedya vi ki nepli annan pri kontrol.

«Napa pri kontrol e se marse ki determin pri. Pri i ganny determinen par lakantite pwason ki an demann e kantite pwason ki peser i anmenn ater,» minis ti eksplike.

I ti azoute ki nou tou nou’n viv dan letan vann nor kot i annan bokou pwason ek letan vann swet kot pwason i ser, me tou dernyenman in annan en gran logmantasyon dan pri sa komodite e parmi bann lezot fakter ki osi afekte pri pwason  i demann sorti kot bann lotel e bann dimoun ki fer bann lezot prodwi ek pwason ki’n osi ogmante e in annan bidding pour pwason ki’n fer pri mont en kantite e peser ki pe dir ki kou pour al lapes in osi monte e sa i enkli labwet ek karbiran.

Me i ti dir ki ozordi pri pwason avek vann swet ki pe fini pe stabilize me minister i anvi vwar bann pri ki stab toultan.

Swivan en kestyon siplemanter lo si lefe ki konsesyon ki sa sekter pe benefisye pa pe ariv kot konsonmater, Minis Sinon ti dir ki SFA pe fer en letid lo bann konsesyon ki peser i gannyen e sa i lo karbiran ek ice pour vwar si sa bann konsesyon zot ankor relevan, si zot reflekte dan pri pwason e ki degre efektiv zot ankor efektiv, si I annan labi e kote ki annan labi.

Lo kestyon si pri pwason i koze par diminisyon dan stok oubyen ogmantasyon dan demann, minis ti dir ki apard plis lotel ki pe demann pwason e plis pwason pe ganny process, plis pwason pe ganny eksporte par bann endividi.

I osi annan peser ki pe dir ki i annan serten pwason ki son stok pe diminyen e sa osi i annan letid ki pe ganny fer a diferan nivo.

«Revizyon dan lalwa lapes ki lasanble fek aprouve pou osi donn SFA ek minister abilite pour enkorpor sa bann sousekter lapes ki avan zot pa ti pe donn bokou latansyon, parey pwason ki ganny atrape par bann bato lwazir parmi lezot e ki pe vin deplizanpli avek lekipman e pe lapes bokou pwason si pa plis ki bann peser,» Minis Sinon ti eksplike.

I ti azoute ki pour kapab annan en bon kontrol fodre ki tousala i ganny byen monitor.