Statistik 2014 - Dife dan batiman i koz domaz lavaler 18 milyon roupi |08 January 2015

De parmi bann ka dife lannen pase

Domaz lavaler en pe plis ki 18 milyon roupi in rikorde an rezilta dife dan batiman lannen pase konpare avek lannen 2013 kot sa sif ti en pti pe par lao 16.5 milyon roupi, Lazans Servis Tenny Dife ek Sovtaz in dir.

Dife dan sa blok apartman Roch Lane, Bel Air ver lafen lannen i legzanp lanpler dega ki dife in fer dan batiman  pandan lannen 2014.  

Menm si sa 22 ka dife dan batiman lannen pase ti 3 ka an mwens ki an 2013, Lazans Servis Tenny Dife ek Sovtaz i dir ki in annan en pert plis ki 18 milyon roupi dan sa kategori dife lannen pase konpare avek en pti pe par lao 16.5 milyon roupi son lannen avan.

“Lannen pase in annan dife ase serye dan bann flats, dan bann lakaz ki’n brile konpletman e sa i akoz letan dimoun i vwar dife, dife in fini devlope e letan nou arive par ler nou pa kapab fer nanryen,” zofisye relasyon piblik kot Lazans Servis Tenny Dife ek Sovtaz Msye Jones Madeleine i dir.

I ti osi fer resorti nesesite pour plis formasyon pour bann zofisye tenny dife.
“Pour lemoman nou napa vreman sa training ground pour ekspoz nou zonm au maksimonm kot zot kapab fer fas a en lensidan dife reel e sa i en defayans ki nou annan,” Msye Madeleine i dir.

Ziska le 31 Desanm 2014 Lazans Servis Tenny Dife ek Sovtaz in rikord en total 493 ka kot dimoun dan detres ti telefonn zot pour rod lasistans  konpare avek 365 ka an 2013.

Msye Madeleine i dir ki dimoun i telefonnen pour rod lasistans non pa zis dan ka dife me osi dan ka kot  pye dibwa in tonbe, lateras in grennen e osi delo monte kot bann zofisye ti bezwen ponp delo. Ti annan antou 255 ka parey.

“Lazans Servis Tenny Dife in ganny en kantite calls ki nou ti bezwen azir lo la me kot i konsern dife dan bann building sa in diminyen an 2014 konpare avek 2013 me par kont statistik i montre ki dife dan transpor in ogmante,” Msye Madeleine ti dir.

Kantite dife dan transpor rikorde ziska le 31 Desanm 2014 ti 23 ka konpare avek 15 ka pour menm peryod lannen avan.

Msye Madeleine i dir kou pert pour sa bann transpor dan dife lannen pase in estimen a 2 milyon roupi konpare a  639 mil roupi selman pour lannen 2013.

Dapre Msye Madeleine sa bann dife dan transpor i souvandfwa an rezilta fot mekanik e bann travay elektrik ki’n mal fer. Lo sa size i ti fer resorti ki konmela apard mekannisyen i annan bokou lezot  dimoun ki fer diferan kalite wiring dan transpor pour enstal lalimyer anplis, lanmizik ek lezot kalite modifikasyon.

“Tousala i kontribye pour ogmant kantite lensidan dife ki kapab arive,” Msye Madeleine ti dir.

Ti osi annan plis lapel pour entervenir dan dife brousay e kot dife ti sape ler dimoun ti pe bril salte ; 73 ka antou in rikorde dan sa kategori ki reprezant en pert lavaler 750 mil roupi, swa en tyer lavaler pert rikorde an 2013 ki ti 2.4 milyon roupi.

Kot i konsern dife abor bato ki Lazans Servis Tenny Dife ek Sovtaz ti rikorde an 2014 sa ti double pour vin 4 konpare avek 2 son lannen avan e ladan enn ti dife dan bato lapes lokal tandis ki sa 3 lezot ti dan bato etranze.

Msye Madeleine in osi note ki lannen pase in annan mwens ka kot dimoun in fer bann zofisye deplas pour nanryen, e pour sa in profite pour remersye manm piblik pour azir dan en fason pli konsansye.

In osi remersye bann paran pour edik zot zanfan lo danze dife ek lenportans sa servis ki la pour sov lavi dimoun an danze .