Gouvernman pou entrodwir Letid Lenpak Sosyal (SIA) |10 June 2015
Avan ki okenn gran proze devlopman i ganny antreprann dan Sesel, lalwa i egzize ki en Letid Lenpak Lanvironnman oubyen Environment Impact Assessment (EIA) i ganny fer. Sa se pour determin lefe advers lo lanvironnman ki sa proze i kapab anmennen.
Gouvernman in aprezan vwar li neseser pour egalman fer en Letid Lenpak Sosyal oubyen Social Impact Assessment avan ki okenn gran proze i ganny aprouve. Sa a permet evalye bann lenpak sosyal ki sa devlopman i kapab anmennen - setadir son lefe lo popilasyon - e ki sa devloper i kapab fer pour minimiz sa lenpak.
Se Minis pour Litilizasyon Later ek Lakaz Christian Lionnet ki ti fer sa lanons pandan sesyon reponn kestyon dan Lasanble Nasyonal yer. Letan i ti pe reponn kestyon bann manm, Minis Lionnet ti azoute ki Sesel pe met anplas sa SIA avek led Labank Devlopman Afriken (AfDB) ki pe fer en letid lo son fezabilite e ki pou byento anvoy en ekspert isi.
Minis Lionnet in osi dir ki gouvernman i kwar ki tou proze devlopman i devret anmenn en benefis pour kominote e pei. An konsekans, in azoute, gouvernman pe met kondisyon lo bann devloper pour envestir dan kominote e amelyor lavi bann zabitan. Sa i enkli fer sir ki zot envesti dan fasilite piblik parey trotwar ek lalimyer.
In dir ki sa partenarya in konmans anmenn serten fri kot par egzanp lotel Savoy in finans serten proze amelyorasyon lakot Beau Vallon e in kontribye sibstansyelman dan logmantasyon volim elektrisite dan Nor Mahé. Minis in osi sit serten lezot proze ki’n materyalize dan distrik Bel Ombre ek Takamaka.
In azoute ki dan kad sa partenarya, bann envestiser i osi kapab kontribye dan devlopman bann distrik ki napa gran potansyel touristik, parey Mont Fleuri ek Les Mamelles.
Minis responsab pour Litilizasyon Later in osi anonse ki gouvernman pou byento met en porsyon later a dispozisyon bann pti antreprener dan sak distrik. Sa proze, ki pou apel ‘Seychelles One District Project’, pou ganny met anplas par Minister Lenvestisman, Devlopman Lantreprenarya e Inovasyon Biznes e pou permet kreasyon en lespas biznes dan sak distrik.
An relasyon avek sa proze, gouvernman pou reevalye plan litilizasyon later dan serten landrwa an konsiltasyon avek bann partener enkli kominote lokal.