Demars pour relans sekter agrikol i kontinyen |05 August 2015
Avek bi relans sekter agrikol, sirtou sekter prodiksyon zannimo, Minister Lapes ek Lagrikiltir ansanm avek Labank Devlopman Sesel pe fer serten travay pour fer ki fermye zot ganny akse a plis kredi e serten fasilite adisyonnel.
En lanons piblik i ekspekte fer tre byento lo sa size enn fwa ki tou keksoz i finalize.
Se minis responsab pour Lapes ek Lagrikiltir, Msye Wallace Cosgrow, ki ti donn sa bann lenformasyon dan sesyon demann kestyon dan Lasanble Nasyonal yer bomaten ler i ti pe reponn kestyon bann manm.
Manm parti mazoriter Maria Payet-Marie ti anvi konnen si sa minister i annan plan revwar fasilite kredi ki bann fermye pe gannyen pour asire ki i ase pour zot konplet bann proze ki zot in konmanse .
Minis Cosgrow ti osi eksplike ki son minister i konsyan bann difikilte ki fermye zot fer fas avek pour kapab ganny bann lòn ki abordab pour zot bann proze agrikol sirtou avek serten lenstitisyon finansyel komersyal.
“Me ozordi i annan en fasilite kredi spesifik ki vize a sekter agrikol e sa se Fon Devlopman Lagrikiltir avek en to lentre 2.5% ki ganny sipor finansyel gouvernman Sesel e i ganny zere par Labank Devlopman Sesel,” Minis Cosgrow ti eksplike.
I ti azoute ki ziska tou resaman sa fon ti pe ofer lòn pa plis ki 250 mil roupi me avek logmantasyon dan kou devlopman dan sekter lagrikiltir sa sonm in ogmante pour ariv 750 mil roupi.
“Fermye avek proze ki kout plis ki 750 mil roupi zot kapab pret larzan anba progranm ‘Pti ek Mwayen Antrepriz’ (Small and Medium Enterprise (SME) scheme) kot zot kapab ganny ziska 3 milyon roupi avek en to lentere 5%. Sa scheme i osi administre par Labank Devlopman Sesel.
Minis Cosgrow ti osi fer resorti ki bann fermye zot osi kapab apros lezot labank pour pret larzan me zot bezwen kapab konvenk sa bann labank avek bann proze ki rantab e vo lapenn pour finanse.
Minis Cosgrow ti osi reponn lezot kestyon konsernan son minister parey rol en zofisye ekstansyon, nesesite pour revwar fason ki Livestock Trust Fund i ganny zere, demars ki pe ganny fer pour ankouraz plis fermye, sirtou bann pli pti, pour antre dan lagrikiltir organik.