Dife i detri restoran Lanbousir La Digue |14 September 2015

Dife in preski konpletman detri restoran Lanbousir ki trouve Anse Source d’Argent, La Digue.

Sa lensidan dife ti ariv yer granmaten e ler Servis Tenny Dife ek Sovtaz ti ariv kot sa restoran dife ti’n fini detri son lakwizin, stor, bar ek en parti restoran.

Propriyeter sa restoran, Madanm Marie-Cecile Fanchette, pa ti La Digue letan sa lensidan e se son bann zanfan ki ti anons li sa move nouvel.

Prezidan James Michel ki ti lo La Digue dan kad son seri rankont avek bann pti e mwayen antreprener, ti profite pour al zwenn bann zanfan madanm Fanchette yer bomaten menm kot sa restoran ki ti’n brile.

En fiy madanm Fanchette, Sophia, ti dir avek zournal Seychelles NATION ki son manman ti konmans sa biznes 20-an pase e ki in pran bokou letan pour fer li grandi.