‘Zanfan Move’ pe fer fraka avek zot nouvo stil lanmizik |30 October 2015

‘Leson Lo Leson’ i en nouvo single par group ‘Zanfan Move’ ki pe fer gran sikse dan pei. Partou kot ou pase ou tann zis ‘Leson Lo Leson’ – dan parti, dan loto, dan diskotek, setou ki ou tande.

Depi semenn pase sa zenn group in fer sorti en lot single avek tit ‘Popiler’ ki pe fer enorm sikse lo Paradise FM.

‘Zanfan Move’ i en nouvo mouvman pozitiv dan Sesel ki konpri trwa zenn artis ranpli avek talan ki pe demontre zot abilite e eksprim zot lekor atraver en nouvo stil lanmizik lo lasenn lokal.

Bann manm sa group, ki pe ganny zere par ‘Hype Production’, i Jim Hall (Gunz), Leroy Piere (Cocky) ek Kevin Sinon (KS). Zot ti form sa group 2-an pase.

«Group ti ganny kree 2-an pase antre nou menm zanmi. Nou pa ti ekspekte ki ozordi nou ti pou nobou kree en mouvman lo Sesel antye. Sa bann letan nou’n fer detrwa sanson enpe vilger, la nou pe vin avek en nouvo stil lanmizik kot tou sa ki nou dir i pozitiv. Ezy-D (en DJ lo Paradise FM) in nobou pous nou lanmizik pli devan,» Jim i dir.

Jim i azoute ki boukou dimoun pe demande kan ‘Zanfan Move’ pour fer sorti en albonm.

«Les mon dir zot an 2016 nou pe vin avek nou premye albonm ofisyel, e ler Desanm i arive nou pou fer sorti en mix-tape,» i dir.

DJ Ezy D ti dir ki sa group i nepli en group me in vin en mouvman dan Sesel.

«‘Zanfan Move’ ti konmans parey en group me ozordi i pli parey en mouvman. Nou pe ede pour promot bann zenn ki annan talan e anmenn zot lo en semen pozitiv,» i tir dir.

 «Sa non ‘Zanfan Move’ i reprezant lorizin kot san bann zenn artis i sorti. I demontre kot zot in sorti e kote zot pe ale. Zot pe promouvwar en nouvo stil lanmizik ki tou bann zenn i kapab konnekte avek. Sa group i en motivasyon pour tou bann zenn ki oule swiv en lavi pozitiv san vyolans me par eksprim zot lekor atraver lanmizik,» i ti azoute.

Plizyer dimoun in kontribye pour fer sa group vin en sikse e ‘Zanfan Move’ i oule remersye Devis Marie-Thérèse ki’n la pour ed group, ansanm avek Rashid Lafleur, Dominic Amelie (DJ Tido).

‘Zanfan Move’ ti ekspekte performen dan aktivite Dimans Kreol Borlanmer ki ti fer Dimans pase Anse Royale e sa group in promet pour fer zot premye spektak an Desanm.

Zot osi kapab aste ‘Leson Lo Leson’ avek Cable Tune I.D 8834.

Pour tou bann zenn dan Sesel ki pran bann move desizyon dan lavi e ki’n afekte zot dan en fason ou en lot, group ‘Zanfan Move’ i en leson e en lapel ki zot kapab retrouv zot lo bon semen par eksprim zot fristrasyon atraver rap, sante, e osi ekrir lanmizik.