Rezilta preliminer in konfirmen ki en lespes gomon pe anpwazonn pwason |31 October 2015

Rezilta tes preliminer in konfirmen ki se en lespes gomon anpwazonnen dan sa fenomenn algal bloom ki eparpiye enpe partou dan nou lanmer ki pe touy bann pwason.

Tar yer apremidi sef egzekitif Lotorite Lapes Sesel Msye Vincent Lucas ti donn sa leformasyon  lapres.

Msye Lucas i dir bann tes pli aprofondi i ankor pe kontinyen e zot in anvoy ankor esantiyon sa bloom e osi bann pwason dan en laboratwar Lafrans.

Antretan Msye Lucas i dir par prekosyon i pli meyer ki peser pa tranp kazye e manm piblik pa konsonm sa bann pwason koray osi byen ki makro ziska nouvo lord.

Me in dir ki bann gro pwason parey karang, vi ki zot zot deplase e pa reste dan koray zot enpe pli an sekirite me fodre dimoun i redwir kantite ki zot manze e osi pour evite manz zot laser e bann anndan parey leker, lefwa ek dizef akoz se la ki si zot in manz en pti pwason ki’n manz gomon anpwazonnen sa pwazon pou akimile.

Lo son kote komisyonner lasante piblik Dr Jude Gedeon i dir ki dan pwason, nivo toksin i depan lo kantite gomon anpwazonnen ki in manze ou lakantite ki dan lekor en lot pli pti pwason ki in manze. E alor son lefe lo imen i pa pou vin deswit me plito lo en peryod letan si dimoun i kontinyen manz en kantite sa pwason.

I pour sa rezon alor ki i meyer ki dimoun pa manz pwason pour lemoman me si zot bezwen manze, i konseyab pour redwir kantite e osi evit laser ek bann anndan e osi pa donn sa bann trip zot zannimo.

Dr Gedeon in lans lapel pour piblik kontinyen ekout e swiv bann mezir prekosyon pour zot prop lasante.

Sekreter prensipal lanvironnman Msye Alain De Commarmond in dir ki bon nouvel se ki sa bloom pe montre siny ki i pe disperse e sa i swiv sanzman dan divan e mare ki pe trenn li lwen avek nou.