LDS i prezant son bann reprezantan dan distrik |17 May 2016

Linyon Demokratik Seselwa (LDS) in nonm son bann reprezantan pour sak distrik.

Sete tyermenn LDS Roger Mancienne ki ti entrodwir sa 25 reprezantan pandan en rankont ki sa parti ti fer Dimans apremidi dan Sant Konferans Enternasyonal (ICCS) dan prezans bann siporter ek bann lider.

I ti fer byen kler avek piblik ki sa i bann reprezantan distrik e pa neseserman kandida pour eleksyon parlmanter ki ekspekte fer plitar sa lannen.

«Nou fer sa diferans akoz sa ki enportan pour nou la se pour annan dimoun dan distrik ki reprezant LDS, ki fer bann travay parey distribye nou piblikasyon, organiz nou bann siporter pour vin miting ki nou fer, vizit lakaz e fer sir ki dimoun i konnen ki LDS i la. Sa se rol reprezantan distrik,» i ti dir.

I ti osi azoute ki menm si zot ekspekte ki sa bann reprezantan i kapab osi vin kandida pour eleksyon, sa i pa otomatik.

« Bann reprezantan i bezwen osi prouve ki zot pare pour travay. La mon lans en lapel pour tou siporter donn zot sipor zot reprezantan,» i ti dir.

Bann reprezantan avek zot distrik respektiv i konm swivan : Clifford André (Anse Aux Pins), Patrick Pillay (Anse Boileau), Ahmed Afif (Anse Etoile), Flory Larue (Anse Royale), Steve Pillay (Au Cap), Francis Cupidon (Baie Ste Anne ek Grand Anse Praslin), François Adelaide (Baie Lazare), John Hoareau (Beau Vallon), Norbert Loizeau (Bel Air), Nicholas Prea (Bel Ombre), François Rose (Cascade), Wavel Ramkalawan (English River), Regina Alcindor (Glacis), Doyace Porice (Grand Anse Mahé), Loncey Micock (La Digue ek Inner Islands), Bernard Georges (Les Mamelles), Gervais Henrie (Mont Buxton), Jean-François Ferrari (Mont Fleuri), Wavel Woodcock (Perseverance), Clive Roucou (Plaisance), Paul Riaze (Pointe Larue), Godfra Hermitte (Port Glaud), Jany De Letourdie (Roche Caiman), Sandy Arissol (St Louis) and Terence Mondon (Takamaka).

LDS i en parti ki’n ganny formen resaman pour anmenn ansanm serten group lopozisyon ki ti pran par dan eleksyon prezidansyel lannen pase.

Pour reprezant sa nouvo parti zot ti osi devwal en nouvo logo ki senbol sa parti.

Sa logo, ki ti ganny devwale par de zenn, i dan laform en ron e in adopte kouler ble, zonn, rouz, blan ek ver.

Msye Mancienne ti fer resorti ki zot in swazir ble konman kouler ki idantifye zot parti vi ki nou ganny antoure par lanmer ek lesyel ki ble.

Ver ek zonn i reprezant kouler ki serten sa bann parti dan sa mouvman ti servi avan e i osi annan blan ki reprezant lape.

«Zot osi bann kouler ki dan nou paviyon nasyonal. Anmenn sa bann kouler ansanm i vedir ki nou oule reprezant non selman tou dimoun ki’n zwenn ansanm pour form sa mouvman me osi tou Seselwa,» i ti dir.