Seremoni depoz kouronn kot Zonm Lib i mark Lazournen Liberasyon |07 June 2016

En gran lafoul siporter Parti Lepep, ansanm avek zot fanmiy ek zanmi, ti ralye kot moniman Liberasyon devan Maison du Peuple Dimans le 5 Zen pour mark Lazournen Liberasyon.

Sa levennman in vin enn tradisyonnel depi 1978 e i ganny selebre an memwar tou bann ki ti perdi zot lavi kan predeseser Parti Lepep ti vin o pouvwar le 5 Zen 1977.

Premye pour depoz kouronn fler devan sa moniman ki mye koni koman ‘Zonm Lib’ ti sekreter zeneral Parti Lepep Msye Danny Faure, ki osi vis-prezidan pei. I ti ganny akonpannyen par 2 zenn.

I ti gan swiv par lezot manm komite santral parti, lezot kad e osi en reprezantan sak distrik.

Sa lannen i fer trwazyenm fwa ki seremoni depoz kouronn fler i deroul devan Maison du Peule, ki osi biro Parti Lepep.

Apre sa seremoni plizyer aktivite ti ganny fer en pe partou dan bann distrik pour mark Lazournen Liberasyon.