Madanm Pouponneau i selebre 104-an |16 August 2016

Ti antoure avek son 2 fiy, plizyer pti zanfan e aryer pti zanfan ki Madanm Margret Woodfield Pouponneau ti selebre son 104-an yer.

I ti ne le 15 Out 1912 e ozordi sa zabitan St Louis Serret i ankor kapab mars marse kot son lakour e son lasante i ankor byen pour son laz.

Pour sa lanniverser spesyal sa madanm ki Anglikan, byen aktiv e alert, ti resevwar benediksyon par Reveran Wavel Ramkalawan avan ki administratris sa distrik Rachel Joseph ti prezant li avek en hamper sorti kot Prezidan James Michel.

Enn fiy Madanm Pouponneau ki reste avek li, Madanm Daphee Pouponneau, i dir  son manman i ankor tre aktiv e i kapab menm fer son lapriyer dan son liv e i ankor vwar byen kler akoz pa toultan ki i met linet pour lir.

“Menm si i annan son bann pti kapris, manman i annan en bon lasante e i napa ni dyabet, ni tansyon e i manz byen son bann gro manze e kontan bwar dyous mang e manz son toast dan bomaten avek son kafe,” Daphee i dir.

“Mon vreman kontan mon manman i ankor vivan e in ariv sa laz e pour sa mon remersye Bon Dye en kantite,” Daphee ti azoute.