Jean Paul Cecile i lans son premye albonm solo |01 September 2016

Parey proverb i dir ‘plito tar ki zanmen’! Jean Paul Cecile in fer sorti son premye albonm avek tit ‘Mon Pei Sesel’.

Sa albonm, ki konpri 12 sanson, in fini ariv lo marse.

Jean Paul i dir ki bann sanson ki i’n swazir pour met lo sa albonm i annan pour fer avek lavi kotidyen osi byen ki santiman lanmour ant bann anmoure.

«Mesaz sa albonm i lo lavi toulezour, soufrans, lanmour. Sak sanson i annan son prop mesaz lo lavi.  Sa albonm i annan tou keksoz ki ou bezwen pour met ou dan sa laganm kreol,» i ti dir.

Malgre Jean Paul Cecile in lo lasenn lanmizik depi enpe letan, ‘Mon Pei Sesel’ i son premye albonm solo ki i fer sorti.

«Sa i mon premye albonm solo. Mon’n konpoz plizyer sanson e sa 12 ki lo sa albonm i dan stil sega, reggae, zouk. En sanson ki piblik Seselwa i familye avek e ki aparet lo sa nouvo albonm i ‘Bonn sans’,» Jean Paul i dir.

Tit bann lezot nimero lo sa albonm i ‘Revey Ou’, ‘Mon Pei Sesel’, ‘I’n Travay’, ‘Lavi Kontinyen’, ‘Lanmour Malonnet’, ‘Koz Lo La’, ‘La Realite’, ‘Marye Laz Karantan’, ‘Li Dezord’, ‘O Manman’ ek ‘Msye Zaksyon’.

Fodre osi mansyonnen ki i annan bann back-up singers ki’n pret zot talan vokal pour fer sa albonm sa ki i ete. Parmi i Liana Quatre ek Peter Jules.

Lanrezistreman sa albonm in ganny fer kot Seysound Studio, Anse Aux Pins par Peter Jules ek Nabby Jules.

Alors tou bann fans Jean Paul Cecile zot ganny ankouraze pour met sa enn dan zot koleksyon.

Sa nouvo albonm i kout R125 e i anvant dan bann landrwa labitid lo Mahé, Praslin ek La Digue. Par kont si ou aste en kopi avek Jean Paul, ou pou pey selman R100.