4 silenn gaz amonya i ganny ranmase dan lale kot batiman Espace |26 September 2016

Lazans Servis Tenny Dife ek Sovtaz ti yer bomaten retir 4 silenn gaz amonya dan lale ki al kot batiman Espace.

Dapre zofisye relasyon piblik kot Lazans Servis Tenny Dife ek Sovtaz, Msye Jones Madeleine, se enn zot zofisye ki ti vwar sa bann silenn Sanmdi swar letan i ti pe fer patrol e yer bomaten zot ti al dan sa landrwa pour al ranmas sa bann silenn.

«Parmi, 3 ti ankor annan enpe gaz amonya ladan e nou’n les sa gaz koul dan delo pandan lazournen apre nou’n ranmas sa bann silenn vid,» Msye Madeleine ti dir zournal Seychelles NATION.

«Si nou zofisye pa ti’n vwar sa bann silenn i ti a kapab vin en sitiasyon danzere. Sa akoz si en dimoun ki ti pe pas dan sa landrwa ti vwar sa silenn e san konnen kwa ki ladan ti atrap sa silenn e esey ouver,» Msye Madeleine ti azoute.

I pa kler lekel ki responsab pour zet sa bann silenn gaz amonya dan sa landrwa me en lanket in deza ouver.