En komite o nivo dan lalit kont drog |01 December 2016

Gouvernman pe al met anplas en komite o nivo ki a propoz en plan stratezik pour lalit kont drog.

Parmi son bann latas, sa komite pou revwar lalwa National Drugs Enforcement Agency (NDEA) enkli kod etik, striktir ek loperasyon sa lazans osi ki prevansyon ek reabilitasyon bann droger.

Se nouvo Minis pour Zafer Entern Mitcy Larue ki ti fer sa lanons Mardi dan Lasanble Nasyonal. I ti pe reponn en kestyon sorti kot sef lopozisyon Wavel Ramkalawan lo sitiasyon drog dan pei.

Minis, ki’n dir ki depi konmansman sa lannen 100 kilo eroin in antre dan pei, pa’n presize kote bann manm sa komite pou sorti.

In sepandan nonm bann pei prensipal kot drog i sorti. Sa i  Pakistan, Afghanistan e Iran. Parmi bann drog ki antre dan pei, minis pa’n kapab konfirmen si i annan en nouvo drog dan laform en draze an sirkilasyon, e ki kapab afekte zanfan.

Madanm Larue ti osi koz lo sitiasyon drog dan prizon kot i dir mazorite prizonnyen ti deza pe servi drog avan zot antre dan prizon. Sa i kre demann e kot i annan demann i osi annan « supply », i ti dir.

I ti elabor lo bann sours sa problenm ki par egzanp, prizonnyen ki al apwentman medikal, viziter enkli fanmiy, kontrakter ki ofer servis prizon ek travayer prizon.

Konman en solisyon, i ti dir ki son minister pe osi revwar lalwa ki diriz prizon.

I ti osi demann fanmiy bann kondannen pour arete anmenn drog dan prizon.

Onorab Ramkalawan ti lo son kote dir ki drog i en problenm konpleks ki konsern nou tou.

I ti fer remarke ki dan sa demars kont drog, premye landrwa pour met lord se dan NDEA.

I ti ensiste lo sirveyans dan bann por ek erport, toutan regretan ki Minister Zafer Entern ek NDEA napa sifizaman statistik lo sitiasyon drog dan pei.

Minis Larue in endike ki son minister pe travay lo sa bann statistik, ki i’n promet pour kominik avek Lasanble byento.

Atraver zot kestyon, bann lezot manm Lasanble ti evok lezot defi parey kot zot dir bann azan NDEA i travay avek malis e konport zot mal, santans mandatwar e napa remisyon pour bann ki ganny trouve koupab e ki fer lavi bann responsab prizon difisil, lefe ki NDEA i dirize par bann Irlande, bann gro sef ki ganny atrape e ki olye ganny zize zot vin temwen prosekisyon, koripsyon kot larzan ki’n ganny sezi i disparet, serten avyon ki arive e ki pa ganny kontrole, eksetera.

Zot ti osi demande ki i annan prezans permanan NDEA lo Praslin e ki i annan lentervansyon dan bann ‘hot spots’. Enn sa bann nouvo ‘hot spots’ ki’n devlope e ki’n vin en danze pour popilasyon se lans Anse Royale a kote Kaz Kreol.

Dan son konklizyon, Minis Larue ti demann sef lopozisyon pour zwenn avek gouvernman e partaz son plan pour elimin drog, parey i ti dir i pou fer dan en peryod 1-an si i vin prezidan.

Konman i ti dir ki problenm drog i konsern nou tou, i ti osi demann lakominote antye pour ede trouv en solisyon.