‘Defi dan lagrikiltir i annan bokou me nou bezwen kontinyen persevere’ |24 February 2017
Msye Raymond Dubel i en fermye aze 64-an ki reste Mare Anglaise kot i annan son laferm e pe fer lagrikiltir pour plizyer lannen.
Sa msye i dir son profesyon ti sarpantye ek mason me lagrikiltir in toultan pratike depi son lanfans akoz son paran ti sanmenm zot louvraz menm si sa lepok i pa ti lagrikiltir modern parey konmela.
“Sa lepok mon paran ek granparan ti plant toutsort kalite gro manze parey manyok, kanbar, lerouy… e zot ti osi fer galet ki zot ti vann tou le semenn e mwan mon’n aprann tousala,” Msye Dubel i dir.
Me menm si i ti’n aprann e fer son formasyon dan sarpantye pli presizeman dan fer toutsort kalite meb e osi cabinet pour lakwizin, i annan apepre 30-an depi ler in retourn dan lagrikiltir.
“Dan mon lespri mon ti toultan kantmenm anvi retourn dan lagrikiltir. Ozordi ler mon gete mon’n ariv lwen dan sa travay e mon kontan mon ti fer en bon swa,” Msye Dubel i dir.
I ti eksplike ki menm si i kontan son metye konman en sarpantye ozordi pour fer meb lokal en sarpantye i depans bokou akoz bann materyo pour travay avek parey dibwa i tre ser e letan ou fini en travay kliyan pa oule peye zot dir ou i ser e zot plifere al aste bann meb enporte menm si apre en pti pe letan zot bezwen rod sa menm sarpantye pour rekole, resere oubyen fer lezot travay reparasyon lo la.
“Dan lagrikitir i annan pli bokou rannman e toulezour i annan demann pour toutsort kalite prodwi laferm,” Msye Dubel in fer resorti.
“Defi dan lagrikiltir i annan bokou me nou bezwen kontinyen persevere e kontinyen plante,” sa msye i dir.
Msye Dubel i ganny led son madanm e serten son bann zanfan pour ed li lo son laferm.
“Depi lontan nou travay ansanm an fanmir pour fer travay marse e mon vreman kontan,” sa msye ti azoute.
Aktyelman lo son laferm sa msye i plant legim, fri, gro manze e i osi sonny zannimo e i annan li en 30enn kabri, plis ki en 12enn bef, en 40enn poul lokal ki i servi pour son prop konsonmasyon.
Keksoz enpresyonan lo son laferm se en gran plantasyon toutsort kalite mang.
“Sa i form parti nou vizyon lonterm. Nou ti mazin byen avan pran sa desizyon pour fer sa plantasyon mang. Letan ou en planter ou bezwen mazin ou lavenir, konsonmasyon ek demann pour bann prodwi lo marse e ozordi nou pa regrete, rannman i bon,” Msye Dubel i dir.
Menm si son bann mang pa’n tro raporte sa de dernyen lannen, Msye Dubel i dir sa pa’n tro afekte li. I dir lenfestasyon senir plim osi in afekte enpe rekolt me tousala i bann defi ki i dir konman en fermye i bezwen kontinyen fer fas avek.
Msye Dubel i dir toulezour i annan prodwi ki sorti lo son laferm ki al bazar ki son pli gran landrwa lavant.
I dir ki pli gro defi ki prodwi lokal i fer fas avek se lakantite lenportasyon e sa i fer ki zot pri i pli bon marse e sa i afekte lavant keksoz ki prodwi lokalman ki tant pour pli ser.
Letan nou ti lo son laferm i ti montre nou son bann diten ki i dir lavant in desann en bon pe e ki la aktyelman i pa pe tro konsantre lo plant sa komodite.
Me Msye Dubel i dir i pa dekouraze par tousala.
“Konman en fermye ou bezwen toultan pe prodwi diferan kalite keksoz akoz ou bezwen mazin grander ou marse,” i ti azoute.
Msye Dubel i dir ki i osi krwar i annan tro bokou sanksyon lo bann prodikter lokal e sa i dekouraz zot bokou e sa san kont tou sa kantite prodwi enporte ki an konpetisyon avek zot.
Lo son laferm Msye Dubel i osi annan diferan kalite manyok, bannann e sirtou bannann mil ki i dir i annan en gran demann.
Menm si i plant tou legim parey bred, leti, sou, konkonm me sa i pa toultan me selman apre ki i’n vwar ki lo marse i annan en mank.
“Mon kontan plant selon marse pour mwan kapab fini vann tou mon prodwi. Mon pa plante apre pour pa vann,” Msye Dubel i dir.
I ti fer resorti ki i servi tre pe pestisid lo son laferm e sa i selman letan i plant serten legim parey konkonm.
“Me an zeneral mwan mon kontan sa ki mon fer e mon pou kontinyen travay akoz mon kontan e sa i en keksoz merveye pour mwan ek mon fanmir.
Bon Dye i donn mwan sa ki i kwar mon merite e mon kontan,” Msye Dubel i dir.