Sekter prive i eksprim mekontantman avek letid por |07 April 2017

Bann manm sekter prive ek piblik ki annan lentere dan zesyon por ti donn rekonmandasyon e diskit lo letid ki’n ganny zenere pour agrandi por.

Sa ti deroul pandan en rankont yer kot Lotorite Por Sesel (SPA) e ti ganny dirize par sekreter prensipal pour laviasyon sivil, por ek lamarin Garry Albert avek bann eksper enternasyonal ki ti enkli delegasyon sorti kot Linyon Eropeen (EU) ek Maritime and Transport Business Solutions (MTBS).

Konsiltan lo sa proze ki direkter proze kot MTBS Victor van Leengoed, ti prezant rezilta lo dezyenm faz sa letid ki baze lo finansman sa proze.

Premye opsyon ki ti ganny propoze ti land lord model kot gouvernman i pran kontrol atraver SPA e lot opsyon ti en partenarya ant sekter public ek sekter prive (PPP).

Bann partispan ti fer resorti ki zot pa satisfe avek bann prezonpsyon ki’n ganny fer dan sa letid an dizan ki sa bann sif pa realistik.

PS Albert ti pran desizyon pour fer bann konsiltan rezwenn avek bann envestiser ki annan lentere dan sa proze pour revwar bann sif e asire ki i realizab.

I ti dir i paret ki konsiltan pa’n fer ase konsiltasyon avek bann envestiser kan zot ti pe fer letid.

“I nepli en sitiasyon kot gouvernman i fer tou. Gouvernman i zwe son rol ki i sipoze zwe konman en fasilitater e donn loportinite Seselwa ki anvi partisip dan sa lenvestisman,” i ti dir.

I ti dir ki fodre sa proze i annan latransparans, bon gouvernans ek accountability.

Bann manm ti regroupe apremidi pour kontiny diskisyon e revwar si pour tonm lo serten lagreman sorti kot bann envestiser.