Minis Siméon i satisfe avek son vizit lo Praslin ek La Digue |07 August 2017

Akonpannyen par son bann teknisyen, Minis pour Zafer Lafanmir, Madanm Jeanne Siméon, ti fer en vizit Praslin ek La Digue semenn pase pour li familyariz son lekor avek bann servis ki son minister pe ofer lo sa de zil.

Vizit ti konmans La Digue an premye kot lakour bann dimoun aze e la sa dizenn zabitan, ki plito Digwa, ti ganny sans diskit avek sa delegasyon. Answit vizit ti kontiny kot biro lazans servis sosyal lo La Digue e plitar Baie Ste Anne ek Grand Anse lo Praslin.

“Apre nou vizit, minis in ganny sans rankontre bann travayer lo sa de zil e vwar zot lanvironnman travay. Nou’n ganny sans diskit lo zot bann defi. Lo La Digue, sa ki rekonfort nou se ki zot ganny sipor bann lezot partener ki asiste zot pour kapab zwenn bezwen lakominote. Lo kote Praslin nou satisfe avek travay bann zofisye an prenan kont ki bann ka ki pe ganny raporte pe byen ganny follow-up e travay lentervansyon pe ganny fer. Me zeneralman nou satisfe ki bann travayer pe esey zot mye avek bann ka ki devan zot e nou’n not bann konstrent ki zot pe fer fas avek pour nou kapab asiste zot lo nivo minister,” Madanm Linda William-Melanie, sekreter prensipal pour zafer sosyal, ti dir.

Kot lakour bann dimoun aze lo Praslin, sa delegasyon ti rankontre avek serten sa sis zabitan sa lakour. I enteresan note ki tou le sis zabitan sa lakour i aktyelman bann dimoun sorti Mahé.

“Sa i donn nou lenpresyon ki Pralinwa i okip byen zot bann dimoun aze,” Madanm Cindy Jean, responsab sa lakour, ti partaze.

Lo tou le de zil, vizit lakour bann dimoun aze ti plito vize ver diskisyon lo kondisyon lavi bann zabitan ensi ki lenspeksyon bann lenfrastriktir. Minis Siméon ti partaz son lenpresyon avek nou: “Ozordi nou’n ganny sans vizit bann dimoun aze lo Praslin ek La Digue e diskit avek zot lo ki mannyer zot pe vwar zot sezour dan sa de lakour. Laplipar i santi zot byen, zot panse ki zot pe byen ganny okipe e bann travayer i tret zot byen. Sa i fer zot sanble konfortab e ere. Me toudmenm kan nou’n vizit anndan dan zot lakaz nou vwar serten keksoz kot nou kapab amelyore. Menm dan serten ka kot nou vwar zot televizyon ou radyo pa pe marse nou ava fer le neseser pour fer provizyon pour zot. Deza nou ti’n ganny demann pour vin vwar sitiasyon lenfrastriktir e nou’n profite pour pran not e vwar kimannyer pour bouz devan. Nou asire ki apre sa bann zabitan ava santi zot pli konfortab.”

Msye Marcus Simeon, sef egzekitif Lazans pour Proteksyon Sosyal, ti osi form par sa delegasyon e ti pe profite pour vwar kondisyon bann dimoun aze dan sa bann lakour e ki pe pase lo bann zil konsernan bann servis ki lazans pe ofer.

“Nou’n osi vwar ki bann lakour ki ase ansyen i demann serten travay reparasyon e nou annan plan pour fer serten travay byento,” Msye Simeon ti dir.

Bann portre ki akonpanny lartik i montre Minis Simeon ek son delegasyon pandan zot vizit lo Praslin ek La Digue.

Teks: Nadia Bedier

Portre: Romano Laurence