Madann Pouponneau i selebre son 105-an dan en lanmes spesyal |16 August 2017

Madanm Margaret Pouponneau ti ganny 105-an yer le 15 Out. Pour selebre son lanniverser, en lanmes spesyal a son faver ti ganny selebre dan Katedral St Paul Victoria, swivi par en resepsyon dan lasal Sir John Thorpe Hall, en batiman pour Dyosez Anglikann Sesel.

Pandan resepsyon Madanm Pouponneau ti resevwar en pannyen sorti kot Prezidan Danny Faure. Pannyen ti ganny prezante lo lapar prezidan par ladministrater distrik St Louis, Madanm Rachel Marie.

Fodre note ki Prezidan Faure ti pas vwar Madanm Pouponneau Vandredi pase pandan son vizit dan distrik St Louis. Sa zour prezidan ti osi vizit Mont Buxton.

Seremoni lanmes ti fer par Reveran Wavel Ramkalawan asiste par Reveran Daniel Kalle, kot tou le de pret ti ofer benediksyon sa madanm.

Prezan kot selebrasyon lanmes ti fanmiy ek zanmi Madanm Pouponneau e manm Mother’s Union ki Madanm Pouponneau i en manm. Me selman zis enn son fiy, Daphne Pouponneau, ki aze 77-an, ki ti prezan. Rezon pour sa se ki enn son fiy ek son garson i aletranze e son premye fiy in mor.

Madanm Pouponneau in marye avek defen Msye Wilby Pouponneau. I annan 4 zanfan -- 3 fiy ek en garson e plizyer pti zanfan. Son garson i Langleter e enn son fiy i Itali. Son premye fiy, Beryl, in desede.

“Mon manman i ankor kapab fer son bann tripo kot lakour. Par egzanp pour lir i pa ni bezwen met linet,” Daphne ti dir.

Dan son sermon, kot i ti koz lo son bann leksperyans avek sa madanm, Reveran Ramkalawan ti partaz enpe bann anekdot lo lavi sa madanm ki i konn tre byen akoz i ti en zanfan ki ti grandi Semen Serret dan distrik St Louis, kot Madanm Pouponneau i reste.

Reveran Ramkalawan, ki apel Madanm Pouponneau ‘NoNo’, ti dekri li konman en madanm strik me avek en bon leker.

I ti osi reviv bann pti ensinifyan zanfan kot zot ti rod semen pase pour al vol zanmalak kot sa madanm.

Reveran Ramkalawan ti osi dir ki Madanm Pouponneau in pas atraver preski tou sa listwar legliz Anglikann Sesel e osi listwar Sesel li menm.

Seremoni lanmes ti termin par sanson ‘Happy Birthday to you’.