Mon lanmour pour mon Kreol Seselwa |03 November 2017
Mon anvi segonn sa mosyon par sa ‘Kreol tre konsernen’ swivan son let dan zournal Seychelles NATION – Merkredi le 25 Oktob, 2017. Vreman, bokou dimoun enkli mwan menm nou’n vreman enpe dezapwente avek fason bann aktivite Festival Kreol in deroule.
Set avek en lespri Linite ek Lanmour pour mon kiltir ek tradisyon ki mon’n ekrir sa pti lartik pour piblikasyon dan ou zournal.
2 Thes 2:15 – “Alors mon bann frer, debout ferm e tenir sa tradisyon ki nou’n montre zot, swa ki’n ganny dir ouswa kin ganny ekrir”.
Mon ti ava’n plito swete ki en legzibisyon ti’n ganny monte kot kwizinyen pe prepar bann pla ek manze lontan, par egzanp: ladob, penpen, moukat, galet – pour nonm en de! Epi, osi montre preparasyon katkat bannann ek lezot pla ki fer ek mayok, patat, lerouy ek kanbar, ki nou nepli vwar dan lakwizin Kreol. Mon toutafe krwar ki sa ti pou atir e byen ganny apresye par manm piblik ek bann zenn denozour.
Pour progranm louvertir – akoz pa ti montre nou ladans orizinal sega, moutya, kanmtole, tinge ek performans par nou latroup kiltirel nasyonal, ki ti pour pli byen ganny apresye par nou popilasyon ozordi. Annou arete avek sa bann lenflians enternasyonal ki pou touy nou kiltir ek tradisyon.
Annou anmenn nou penwar, kazak, gode ek lezot laform lar tradisyonnel ki kapab enflians nou zenn pour pran sa dan zot lavi toulezour, pour koud e promot nou bann lenz tradisyonnel e promot nou lanmod lepase.
Annou aret mazin zis fer larzan ek nou gen personnel, me annou mazin byennet Sesel ek nou pep Seselwa. Annou pa zis koze: ‘Annou met Sesel premye’, me annou montre nou senserite ek langazman dan nou bann aksyon konkret, ki lepep Seselwa i a vwar e i a ‘ziz nou par nou aksyon’.
Nou kiltir, nou lalang, nou koze ek nou tradisyon pa pou zanmen propaze atraver zis zoli parol alokazyon Festival Kreol, me annou met li angar e an aksyon toulezour dan nou fason fer e dan nou pratik toulezour. In ler pour nou arete sa bann ‘ipokrizi’ dan sa ‘nouvo Sesel’, e annou plito fer aksyon ek senserite e demontre nou lanmour pour pep Seselwa.
Mon salye SBC pour sa linisyativ ‘Kiltir Plis’ e mon swete ki sa i a kontinyen pour ankor plizyer lannen. Akoz SBC ek lezot medya pa osi mont en progranm ‘Lakwizin Kreol’, kot bann kwizinyen a vin demontre e edik nou pep lo bann pla kreol lepase?
v Oli kannet, oli toupi, oli servolan, oli konos, oli lapi laponn, oli granmanman bebe? Sa bann zwe ki fodre ganny deviste e re-entrodwir e demontre pandan Festival Kreol. Akoz Minister Spor an partenarya avek Minister Kiltir ek Minister Ledikasyon pa inisye e organiz konpetisyon toupi (par egzanp) o nivo nasyonal e menm o nivo lekol? Eski sa zwe ‘petank’ pa’n evolye dan nou zwe kannet lepase? Oli konpetisyon domino pandan Festival Kreol?
v Akoz zot pa ti met enn de latab domino kot Vilaz Kreol pandan sa 10 zour, sirtou pandan wikenn? Sa ti nou zwe prensipal ‘anba langar’ lontan!
v Eski manrmay denozour pa ti a kontan zwe ‘lapi lapon’, parey dan nou letan lontan?
Annou pa zis koze, annou osi VIV nou kreolite dan nou lavi toulezour. Se par sa bann realite lavi ki nou kreol i a tenir e pa perdi ek levolisyon. Annou VIV nou kreol Seselwa konmansman ozordi menm…….
Mersi e ‘chapeau’ a bann manm organizater pour aktivite ‘Dimans borlanmer’ ki ti deroul Beau Vallon sa Dimans pour Festival Kreol.
Jacob Terence Madeleine
Ekriven - Advokater Linite Nasyonal