Theresina ek Mcdonald Benoit i selebre zot Nosdor |24 August 2021
Theresina ek Mcdonald Benoit zour zot ti selebre zot Nosdor
Ti le 22 Out 1971 ki Theresina ek Mcdonald Benoit ti dir wi pour premye fwa dan legliz Sent Marie Madeleine Takamaka e ti promet atraver zot ve maryaz pour viv ansanm pour touzour.
Dimans le 22 Out, 50-an pli tar, sa koup ti retourn dan sa menm legliz pour renouvle sa ve ki zot ti fer letan Msye Benoit ti aze 22-an e Madanm Theresina li ti aze 21-an.
Sa ti pandan lanmes 8er bomaten selebre par kire sa parwas, Per Eric Leon.
Ozordi, Msye Benoit i aze 72-an e son madanm i aze 71-an.
Sa koup i annan senk zanfan – trwa garson ek de fiy enkli de zimo en fiy ek en garson ki aze 40-an.
Zot annan zot wit pti zanfan.
Bann lektir pandan sa lanmes spesyal ti konsantre lo lanmour, lobeisans ek pasyans ant bann koup e Per Leon dan son lomeli ti dekri bann koup ki arive viv 50-an lavi maryaz avek tou son bann defi e difikilte konman bann ero.
Apre ki Per Leon ti’n beni a nouvo zot lalyans, sa koup ti renouvle zot ve anver kanmarad e remet zot lalyans. Apre zot ti siny en kopi sa sertifika maryaz ki zot ti sinyen 50-an pase.
Msye Benoit i dir ler i ti zwenn sa fiy i ti ankor tre zenn e pour bokou letan zot in zanmi avan ki zot ti konmans kontan.
Menm si son swa pa ti tro fer plezir son fanmir, Madanm Theresina ti marye. Me plitar ler i ti ganny problenm dan son relasyon, son manman ti dir li ki i son lafot e rezilta son dezobeisans.
“Lavi pa ti fasil e ti annan de ler mon dormi e mon dir dan mwan menm ki demen mon pou fer separasyon me son landmen ler mon leve mon dir non mon ava esey ankor. Mon ti osi ganny konsey en vye madanm kot mon ti al koud ki toultan mon ti rakont li mon problenm me i ti dir mwan ki pa toultan ki lavi ti pou fasil e ki lavi pa fini la me ki mon pa tousel e ki Bon Dye i avek mwan. Mon ti toultan ekout son konsey e mon ti osi priy bokou ziska mon’n ariv la.”
Lo son kote Msye Benoit li in admet ki se gras a son madanm ki in ariv sa zistans akoz litousel i pa krwar ki i ti pou arive.
“Mon ti ankor zenn, mon ti marse e mon ti dan semen toulezour. Keksoz pa ti fasil,” i ti dir.
Msye Benoit in en drayver tou son lavi e pour 32-an in dray bis SPTC tandis ki son madanm ti fer travay domestik a en tre zenn-az e i ti osi en koudriyez me i dir letan i ti’n konmans ganny zanfan i ti arete travay pour konsantre lo okip son bann zanfan, son fanmir ek son lakour.
Sa koup i tre zwaye pour mark sa gran moman dan zot lavi antoure par tou zot zanfan ek pti zanfan e konman kado pour zot Nosdor sa koup in pas en wikenn dan en gran lotel.
Marie-Anne Lepathy