Dimoun aze i ogmant zot konnesans dan litilizasyon teknolozi |30 September 2021
Latelye ti ganny dirize par Betty-Mai Sofa ek Bernard Songoire (Portre: Thomas Meriton)
Bann tyermenn sorti dan klib trwazyenm-az dan bann distrik lo Mahé ti swiv en latelye en demi zournen yer lo litilizasyon teknolozi dan zot lavi toulezour.
Sa latelye anban tenm ‘Akse teknolozi pour tou laz’(‘Digital Equity for All Ages’), ti deroul dan sant ladministrasyon distrik Roche Caiman pour konmemor Lazournen Enternasyonal bann Dimoun Aze ki tonm demen le 1er Oktob. I ti’n ganny organize par departman dimoun aze ek dezabilite dan Minister Lafanmir an kolaborasyon avek Minister Gouvernman Lokal, Liniversite Sesel (UniSey) ek Lasosyasyon Klib Trwazyenm-az.
Dapre sa tenm par Nasyonzini sa lannen, bann dimoun aze zot sipoze annan akse avek teknolozi e osi kapasite dan lenformasyon lo sa bann teknolozi, san okenn diskriminasyon, pour zot kapab, konman en endividi oubyen an kominote, partisip plennman dan aktivite demokrasi e ekonomik, parmi lezot, nou sosyete. Alor bi sa latelye ti pour ede montre nou bann dimoun aze lenportans e ki mannyer pour servi bann diferan form teknolozi ki pou ed zot reste azour avek sa monn nimerik.
Osi prezan pour asiste sa sesyon ti sekreter prensipal pour Lafanmir, Clive Roucou; direkter zeneral departman dimoun aze ek dezabilite Rosa Morin; direkter pour dimoun aze dan sa departman, Liza Cadeau; reprezantan Gouvernman Lokal Philipa Larue, parmi lezot envite.
Sa sesyon ti dirize par Betty-Mai Sofa ek Bernard Songoire sorti kot Liniversite Sesel. Zot ti koz lo lazistis (dan sa monn nimerik) anterm pour ki sa bann dimoun aze zot ganny aske avek lenformasyon lo sa bann diferan teknolozi e osi byen ki zot litilizasyon, benefis ek dezavantaz.
Dan son ladres pour lans sa latelye, PS Roucou ti dir ki dan Sesel an sa ki konsern sa monn nimerik, bann dimoun aze in laplipar ditan ganny dezavantaze ler i ariv lo teknolozi.
I ti osi fer remarke ki pandemi Covid-19 in prouve ki teknolozi in vin pli enportan ki zanmen dan nou aktivite toulezour, par egzanp ler pour pey bill, fer shopping atraver internet (on-line), eksetera, kot la bann zenn zot azour konpare avek bann dimoun aze.
PS ti demann zot pour sezi sa loportinite ki i ava ed zot kapab osi servi en ‘smart phone’ pour telefonnen oubyen fer en ‘video call’ ek en manm lafanmir lokal oubyen ki aletranze e menm servi en ‘laptop’ pour anvoy en ‘e-mail’ parmi lezot fonksyon ki bezwen ganny fer par teknolozi.
Tou bann dimoun aze ki ti koz avek zournal Seychelles NATION ti dir ki teknolozi dan sa monn ozordi i en bon keksoz e en nesesite e bann ki pa konn servi zot devret fer sir ki zot konn fer li.
Zot ti osi dir ki sa kour in ed zot vwar zot bann zanmi ki Covid-19 in anpes zot vwar pour enpe letan.
“Mwan, mon fer preski tou mon keksoz mwan menm lo mon telefonn. Menm mon larzan i anrezistre ek labank. Si en keksoz i arive laba, mon konnen. Sa i montre ou ki mannyer i bon konn servi sa bann teknolozi. Si ou pa konn servi sa bann zafer dan sa letan la ki nou ladan, dir ou fini,” Maryline Florentine, reprezantan Mont Fleuri, ti dir.
“Teknolozi i kapab fer ou pa fer depans par zis asiz kot ou e fer tou sa ki ou anvi fer san bezwen pey transpor pour desann anvil. Sa lemonn ki nou pe viv ladan pe devlop vreman vit e si ou asiz deryer ou pa bouze ou pou vwar ou pe reste deryer menm,” Philip Barbe, reprezantan Baie Lazare, ti dir.
Dapre tyermenn dimoun aze, madanm Germaine Valentin, en bon pe parmi zot ti a pe swiv en kour labaz dan teknolozi nimerik ofer par Liniversite Sesel depi 2018, me sa ti arete avek laparisyon sa pandemi.
I swete ki sa liniversite a kapab rekonmans sa kour pour benefis lezot manm ki pa ankor ganny sans pour swiv.
Madanm Valentin, ki sorti dan distrik Beau Vallon, ti azoute ki sa latelye in ed zot sorti dan sa izolasyon ki sa pandemi in anmennen e in donn zot konfyans pour re-ganny sa kominikasyon perdi.
Patrick Joubert
