‘Tou dimoun dan pei i devret ganny zot pansyon menm laz’ |11 October 2021
Miting an progre (Portre: Louis Toussaint)
“Tou dimoun dan pei i devret ganny zot pansyon menm laz.”
Sa ti konsansis ki ti sorti dan en miting fer dan sant kominoter St Louis yer par Lasosyasyon Pour Promouvwar Latrankilite ek Respe.
Sa rankont ti annan pour bi ganny lopinyon bann dimoun lo laz ki dimoun i ganny peye zot pansyon dan pei.
Sa i vin an rezilta propozisyon fer resaman par Fon Pansyon (Pension Fund) pour fer monte laz pansyon sorti 63-an pour vin 65-an. Me zot ti dakor avek Fon Pansyon pour fer monte poursantaz lo peyman ki pansyon i ganny peye vi ki dimoun pe viv pli lontan e resours pour fer peyman pou kapab limite dan lavenir.
Apard bann manm egzekitif sa lasosyasyon, dan lasal parmi manm piblik ti manm Lasanble Nasyonal pour sa distrik, Sathya Naidu, depite spiker e manm Lasanble Nasyonal pour Mont Buxton, Gervais Henrie, e sef egzekitif Sosyete Sivil (Ceps) Alvin Laurence.
Dan son deklarasyon, tyermenn sa lasosyasyon, Donald Ernesta, ti dir ki menm si zot lasosyasyon i la pour promouvwar latrankilite ek respe zot osi la pour diskit lezot size dan byennet tou dimoun.
Swivan sa propozisyon pour fer monte laz pansyon, sa lasosyasyon ti fer sorti en let ki zot ti anvoy dan serten lorganizasyon kle dan pei. Ladan zot ti dir ki zot panse ki laz pansyon i devret spesifik e aplikab pour tou sitwayen.
Zot osi dir ki zot santi i pa korek ki serten dimoun i annan sa posibilite pour tous zot pansyon a laz 55-an tandiski lezot i bezwen esper laz 63-an ou plis pour tous sa ki pour zot. Sa ti sirtou relye avek bann politisyen ek bann ki lo lapwentman konstitisyonnel ki zot zot annan sa posibilite pran zot pansyon a laz 55-an.
Dan deba ki ti swiv, sa group dimoun ki ti la ti dakor ki kot i konsern peyman pansyon, tou dimoun i devret ganny sa posibilite pran zot pansyon menm laz.
“Mwan mon krwar ki nou tou nou devret ganny peye nou pansyon menm laz san distenksyon. Nou tou nou’n travay dan sa pei e nou tou nou’n kontribye,” Msye Georges Miloba, 61-an sorti dan distrik Mont Buxton, ti dir.
Msye Ernesta i dir ki swivan konsansis dan sa miting zot pou aprezan fer en petisyon atraver pei pour ganny lezot lopinyon e rezilta ki zot pou ranmase zot pou pas avek bann lotorite konsernen.
Patrick Joubert
