Marie Clarisse i ganny onore par Lasosyasyon Bling Bling Poetry |02 November 2021
Marie Clarisse i sa artis fanm Seselwa ki’n sa lannen ganny onore par Lasosyasyon Bling Bling Poetry pour son kontribisyon imans anver lar e lapoezi Sesel.
Ti pandan seremoni ‘Onor Enn Nou Menm’ ki ti pran plas kot Teat Nasyonal Sanmdi apremidi ki bann poet dan sa lasosyasyon ti resit bann morso ekrir par Madanm Clarisse, tandis ki lezot ti enterpret bann sanson konpoze par li, pour onor li dan prezans son fanmir, manm lasosyasyon ek lezot artis.
Sa artis, ki pratik diferan form lar, ti ganny dekrir konman “enn bann artis fanm Seselwa ki ris avek talan, e ki en oter, konpoziter, santez, poet, pent e modis, parmi lezot”.
Apard son bann poenm ki ti ganny lir par tyermenn lasosyasyon Stephanie Joubert, Tony Raspyek Joubert, Vincent Milius ek Kevin Perrine, bann tablo lar vizyel kree par Madanm Clarisse ti osi kapab ganny apresye par tou.
Madanm Clarisse in marye e i annan kat zanfan, enn ki’n desede, avek de pti zanfan.
I’n pandan son lavi aktiv lo lasenn lar Sesel, kot i’n menm ganny sans pour fer flote paviyon Sesel aletranze dan bann diferan levennman ek konpetisyon.
An 2009, son liv poenm pour zanfan ti ranport pri Rodolphine Young Award for Children’s Literature, e an 2012 i ti ranport Pri Antoine Abel avek en lot koleksyon poenm.
An 2014 konman tyermenn lasosyasyon bann ekriven Sesel, i ti ganny sans pour al partisip dan en festival poenm enternasyonal an Delhi, India.
Bann poenm ek lar pratike par Madanm Clarisse i vas e adres diferan tenm e topik. Son bann poenm i serten fwa baze lo lavi, konsern bann madanm dan en Sesel modern, konsern en paran, e bann diferan sitiasyon ek sirkonstans ki otour li.
“Mon santi mwan, konman en poet e ekriven, fyer pour sa ki mon ete. Mon en Seselwa, mon en kreol e mon ekriven. Tou mon bann fanmiy i la, akoz se bann poet alors mon remersye zot tou ki la. Si ou pou demann mwan ki lar ki mon pli kontan, mon pou dir ou tou, akoz mon vreman swiv tou. Mon en dimoun ki annan bokou pasyans e ki’n aprann bokou. Mon remersye Bondye akoz tou sa ki bon i sorti kot li,» Madanm Clarisse ti dir.
Parmi bann poenm ki ti ganny resite i ‘Granmoun i dir’, ‘Gard pe donn pe’, ‘Lasas deryer divan’ e ‘Mon pa adore larzan’.
Sa lannen i fer katriyenm fwa ki lasosyasyon Bling Bling Poetry i onor en poet Seselwa. Pandan seremoni Sanmdi zot ti prezant trofe avek tou bann gannyan enkli avek, Vincent Milius, Andrea Mounac e Chantal Melanie lo lapar son manman Regina Melanie.
Tyermenn lasosyasyon Stephanie Joubert ti note ki lasosyasyon i reste angaze anver devlopman lar Sesel, espesyalman lapoezi. I ti osi koz lo bann defi ki zot fer fas avek.
“Depi 2015, Bling Bling Poetry Association in vin an egzistans avek bi pour promouvwar lapoezi Seselwa e enspir bann zenn sirtou pour pratik sa lar. Pandan sis lannen ki in la, Blin Bling in anmenn bokou kontribisyon dan promosyon e devlopman lapoezi Sesel. Nou’n met booku lanfaz lo performans, pour montre ki lapoezi pa neseserman en lar ki annwiyan parey bokou dimoun i kwar.
“Atraver sa lar, nou’n osi regroup bann zanfan kot nou’n ed zot devlop teknik ek stil ekrir. Bann zanfan i annan bokou talan me zot bezwen bokou sipor, lankourazman ek loportinite pour zot montre bann keksoz ki zot in aprann, e osi demontre zot talan. En lot nou dezir konman lasosyasyon se pour vwar lapoezi ganny entrodwir dan lekol, pa zis konman bann konpetisyon, me pourkwa pa fer li konman en size akote lar desinen,» i ti dir, e lans en lapel avek bann lorganizasyon ki kapab ofer zot sipor.
Bann portre ki akonpanny lartik i montre serten moman for sa aktivite Sanmdi apremidi.
Laura Pillay
Portre par Dream Light Studio
