De santener Cascade i selebre zot lanniverser   |10 January 2022

Madanm Barrack dan konpanni son pti zanfan

De santener dan distrik Cascade in fek selebre zot lanniverser.

Madanm Noemie Benoit ti selebre son 106enm lanniverser le 2 Zanvye tandis ki  Madanm Marie Antoinette Barrack ti selebre son 103enm lanniverser Sanmdi le 8 Zanvye.

Toulede madanm ti selebre zot lanniverser antoure par zot zanfan, pti zanfan ek aryer pti zanfan e zot in resevwar sakenn en pannyen sorti State House parmi lezot kado ek fler sorti kot manm zot fanmir e osi MNA ek ladministrasyon zot distrik.

Apre ki i ti’n resevwar benediksyon pret laparwas kot son lakour Sanmdi, Madanm Barrack, mye koni konman Tann Nenette, ti fer resorti ki akoz in konn anmenn son lavi, konport li byen e manz en bon ladyet ki fer ki in arive selebre sa laz.

I dir i kontan in arive selebre ankor en lot lanniverser e ki i ankor touzour an bonn sante.

“Mon napa okenn douler, mon lekor i ankor for ziska prezan me mon pa konn demen, mon pa konn tanto ki arive me selman pour konmela mon annan mon bon kouraz. Mon konpran tou keksoz e mon ankor vwar byen kler,” Madanm Barrack i dir.

Son pti zanfan Delores Barrack avek ki i reste i dir son granmanman i ankor byen aktiv e i napa okenn problenm lasante kronik parey tansyon ek dyabet. I manz byen son bann gro manze, son pwason sirtou karang e i osi kontan son lavyann pork.

I dir dan bomaten i prefere son oatmeal, fromaz ek tos. Me i osi apresye lezot keksoz ki zot donn li.

I’n fer resorti ki konmela avek son laz avanse son granmanman pa deplase pour al legliz me pret laparwas i vizit li tanzantan e anmenn lakonminyon pour li.

Seychelles NATION i swet sa 2 santener bonn anniverser e sante.

Teks Marie-Anne Lepathy

Portre en kontribisyon