Follow us on:

Facebook Twitter LinkedIn YouTube

Domestic

En group zabitan Anse Royale i ganny lakle zot nouvo lakaz |17 January 2022

En group zabitan Anse Royale i ganny lakle zot nouvo lakaz

En zabitan i resevwar lakle son nouvo lakaz

Vennkat (24) fanmir dan distrik Anse Royale ti Vandredi resevwar lakle pour zot nouvo lakaz Remise, Ex-Sacos Estate.

Anvi sitiasyon enkyetan Covid-19 dan pei, ti napa okenn louvertir ofisyel sa estate me zis bann zofisye Property Management Company (PMC) ti vini pour distribye lakle avek sa bann fanmir ki ti’n ganny enformen davans.

Manm Lasanble Nasyonal distrik Anse Royale, Madanm Sylvanne Lemiel, ti la pour temwanny e partaz moman lazwa sa 24 fanmir.

Sa 24 fanmir in sanse apre ki zot in kalifye lo sistenm pwen etabli par departman lakaz. Sa bann lakaz i annan 2 a 3 lasanm.

Distrik Anse Royale i enn parmi plizyer lezot distrik kot demann pour lakaz i tre o.

Depi 2019 sa proze 24/24 ki sitie Remise, Ex-Sacos ti konmanse anba ansyen gouvernman e i ti konplete an Novanm lannen pase.

Madanm Lemiel in fer resorti ki sa proze i osi enkli en sistenm tretman desarz (STP) ki pe konnekte tou bann lakaz dan Remise 1, 2, Ex-Sacos ki fek konplete e osi tou bann flats dan Vilaz Banbou.

“Mon oule sezi sa lokazyon pour felisit tou bann fanmir ki’n ganny zot lakle e demann zot pour pran byen swen avek zot lakaz. Fer sir ki repeyman zot lakaz i vin zot priyorite. Viv an bon vwazinaz kot zot tou zot byen avek kanmarad. Mon ankouraz zot pour form zot group ‘community crime watch’ pour asire ki napa nanryen ilegal pe pase dan zot pti kominote,” Madanm Lemiel in demann sa bann fanmir .

Pour bann aplikan dan distrik Anse Royale ki ankor pe esper en lakaz, Madanm Lemiel in demann zot pour pasyante e kontinyen espere e petet byento zot osi zot a kapab sanse e ganny zot prop lakaz.  

 

En kontribisyon

 

More news