Paviyon Sesel i flot o kot konkour labote ‘Miss Environment International’ |05 April 2022
Elsia in fer Sesel fyer kot konkour labote ‘Miss Environment International’
Ankor en fwa, paviyon Sesel in flot tre o dan en lot konkour labote enternasyonal – ‘Miss Environment International’.
Reprezantan Sesel kot sa konkour, Manmzel Elsia Françoise, ti reisi fini parmi le dis finalis.
Premye konkour labote ‘Miss Environment International’ ti fer Sanmdi swar an Lenn (India).
Elsia – ki ti fini konman dezyenm prenses dan konkour labote ‘Miss Seychelles the national pageant’ e osi ganny kouronnen konman ‘Miss Environment Seychelles 2022’ – i ekspekte retourn Sesel sa semenn kot i pou travay tre pros avek departman lanvironnman pour li kontinyen avek son proze lanvironnman ki in deza konmanse.
Fodre mansyonnen ki zis avan Elsia ti kit Sesel pour sa konkour, i ti ganny sans rankontre Minis pour Lanvironnman, Msye Flavien Joubert.
En gro mersi pour lasosyasyon Beauty Empowerment Seychelles, Air Seychelles, Minister Gouvernman Lokal, tou bann sponsors e endividi ki’n met zefor ansanm pour fer sir ki Sesel ti ganny reprezante dan sa enn konkour.
Nou pou fer en antretyen avek Elsia plitar ler i retournen pour nou konn plis lo son parkour.
Nou dir en gro felisitasyon Elsia e nou swet li tou le meyer.
En kontribisyon
